„Тиква зелена, мрш“: Кенијката Емакулате ги учи родителите да зборуваат македонски (видео)
- Детали
- вторник, 26 март 2024
„Те обожавам и тебе и твоите родители“, „Јазикот звучи и убаво и смешно“, „Треба да ги донесеш родителите овде“, се дел од коментарите што ги доби Емакулате на видеото во кое ги учи родителите да зборуваат македонски.
Кенијката Емакулате Вандера Блажеска, која во октомври 2023 доби македонско државјанство и пасош, неодамна го посети своето семејство во родната земја.
Додека беше во Кенија со својата ќерка Дариа, таа постојано објавуваше фотки и видеа од времето поминато со фамилијата, а со следбениците споделуваше и интересни детали за животот таму.
Емакулате сега објави и видео кое стана вистински хит на Инстаграм: „Што научија моите родители на македонски?“.
Во видеото таа ги прашува мајка си и татко си дали се сеќаваат на некои македонски зборови или фрази што таа им ги кажала, а им вели и да повторуваат по неа.
За сето тоа време тројцата не престануваат да се смеат и одлично да се забавуваат.
„Браво. Ајде. Тиква зелена. Добро. Како си? Мрш!“ се дел од зборовите кои тие ги научиле.
Кликнете на видеото за да го погледнете:
Видеото на Емакулате, која има преку 44.000 следбеници на Инстаграм, ги воодушеви и Кенијците и Македонците.
„Те обожавам и тебе и твоите родители“, „Јазикот звучи и убаво и смешно“, „Треба да ги донесеш родителите овде“, се дел од коментарите.
Таа претходно сподели и видео на кое нејзиниот татко вели: „Ако ќерка ми е Македонка, тогаш и јас сум Македонец во срцето“.
Погледнете го видеото:
Емакулате од 2018 живее во Македонија со сопругот Михајло. Таа пред неколку месеци доби македонско државјанство и пасош и тоа го прослави со сопругот, неговите родители и неколку пријатели.
Прочитајте и: Кенијката Емакулате, мажена во Скопје, со носија и шампањ славеше за македонскиот пасош: „И официјално сум македонско девојче“
А. Ј. | Црнобело
Би можело да ве интересира:
Препорачуваме
Најчитани неделава
