Што треба да знае детето при упис во прво одделение?

Детали

понеделник, 13 мај 2024

Детето не мора да знае да чита, но треба да ги препознава буквите... Кои работи е важно детето да ги знае пред да го однесете на упис во прво одделение?

Почнувањето на детето во училиште и запишувањето во прво одделение кај многу родители создава возбуда и нервоза.

Но сепак за да се избегнат непотребната нервоза и притисок добро е и детето и родителите да се подготват за овој голем ден.

Во прво одделение во основното училиште родителот односно старателот е должен да го запише детето кое до крајот на календарската година ќе наполни шест години.

Секако родителите ги мачат прашањата: дали детето е подготвено за на училиште, дали е доволно зрело на тие години и најважно од сѐ, дали ќе помине добро на тестирањето и што треба да знае.

Освен потребните документи, (потврда за примените задолжителни вакцини, потврда од стоматолошки преглед, потврда од извршен офталмолошки преглед, копија од извод од матична книга на родените) детето треба да има и одредени предзнаења.

Посветете време на читање

Добро е со детето да поминете одреден ден од денот кога заедно ќе прочитате приказна, а потоа и да ја раскажете.

Така детето ќе биде подготвено кога педагогот ќе го постави прашањето која е неговата омилена приказна.

Препознавање на букви

Многу родители се фокусираат на тоа детето да ја знае азбуката, да знае да чита и пишува уште пред да тргне на училиште. Но, сепак доволно е само детето да ги препознава буквите.

Научете го да го напише своето име и да ги распознава буквите, а не само механички да ги пишува и изговара.

Се очекува да знае на која буква започнува или завршува одреден збор.

Исто така ова ќе биде добредојдено и за офтамолошкиот преглед, што е неопходен пред упис во прво одделение, за детето да може да ги препознае знаците и буквите во ординацијата.

Препознавање на боите

Она што е потребно пред упис во прво одделение, е детето да ги научи боите.

Се очекува детето да знае да препознае и именува предмети од слика. Посветете внимание на животните и она со што тие се хранат.

Потребно е детето да прецрта одредена слика.

Па така вие низ игра можете да го научите детето како да ги прецрта работите кои вие ќе ги нацртате на лист хартија. Ќе биде забавно и корисно за детето.

Броење

Од детето се очекува да знае да брои од еден до десет и наназад.

Правилно изговарање

Се посветува внимание на тоа како детето ги изговара зборовите. Дали можеби има некоја тешкотија, дали јасно и чисто разговара и дали се изразува граматички.

Она што треба да го знае, е и датумот на раѓање, односно роденденот.

Од детето се очекува да знае во кое годишно време е родено, на кој датум е родено и колку годишни времиња има.

Научете го каде живее

Од различни ситуации во секојдневието добро е детето да знае на која улица живее, а истото е потребно и за тестирање.

Детето треба да го знае своето име и презиме, возраст, име на родителот и занимање на родителот.

Бонус: Пет вештини што детето треба да ги знае пред да тргне во училиште (и на кои треба да работите во текот на летото):

• Да знае да врзе врвки од чевли;
• Само да се облекува;
• Само да оди во тоалет;
• Само да пакува книги - да го подготови ранецот;
• Да знае да запомни што има за домашна работа.

В. К. | Црнобело / фото: pexels.com