Каде е и што прави денес момчето што ја отпеа песната „Наташа од трето три“ – Леонид Ристев?

Детали

сабота, 09 ноември 2024

Леонид признава дека никогаш немал намера да се занимава музика, иако во 1992-ра година отпеа еден од најголемите детски хитови на сите времиња. Како изгледа и што прави момчето што ја испеа песната „Наташа од трето три“ на детскиот фестивал „Си-До“?

„Наташа од трето три“ е можеби една од најпознатите детски песнички со која израснаа децата од 90-тите години, а подеднакво е популарна и за денешните деца.

Песната беше напишана од Драган Каранфиловски-Бојс, а на детскиот музички фестивал „Си-До“ ја исполнуваше Леонид Ристев во далечната 1992-ра година.

Песната брзо стана вистински хит, па по настапот на фестивалот, Леонид имаше голем број настапи во сите популарни емисии од тоа време.

Оттогаш се поминати веќе 32 години, а Леонид денес не се занимава со музика, туку по завршувањето на образованието на универзитетот „Свети Кирил и Методиј“ во Скопје, почнал да работи како правник во Белград.

Во краток разговор за CRNOBELO.com, Леонид ни потврди дека веќе 17 години живее во Белград со синот и сопругата, каде работи во престижна правна фирма која нуди правни совети за клиентите од регионот.

Но, самиот вели дека го користи секој слободен момент за да се врати во родната Битола, каде што живее неговото семејство.

Леонид имал само 9 години кога ја испеа „Наташа од трето три“, која пред фестивалот веќе била напишана под насловот „Наташа од петто три“.

Но, морале да го променат насловот за да го прилагодат на возраста на момчето што ја исполнува.

Според него, успехот на песната, пред сѐ, се должи на талентот на композиторот на песната, Драган Каранфиловски – Бојс, која во комбинација со настапот и името (на песната), едноставно „кликнале“ кај публиката.

За себе вели дека нема огромен музички талент, иако во периодот на основното и средното образование, но и за време на студиите музиката му била хоби, но признава дека никогаш немал ниту намера тоа да му биде главна професија.

Б. С. Б. | Црнобело