Славчо Попоски, метеоролог: „Од утре услови за обилни дождови, силен ветар, но и снег на повисоките места“

Детали

вторник, 19 ноември 2024

„Во Македонија под влијание на серија изразени влажни воздушни бранови ќе има повремени врнежи од дожд, кои локално ќе бидат обилни, поројни и проследени со појава на грмежи“, вели Славчо Попоски.

Веќе ги чувствуваме зимските температури, а во неколку градови имаше и врнежи од снег.

Но, додека деновиве е претежно сончево, веќе од утре можеме да очекуваме промена на времето, заедно со поројни дождови, па и снег на некои места низ Македонија

Во продолжение, прогнозата на Славчо Попоски:

„Под влијание на изразена циклонска активност со центар западно и северозападно од нас, од утре (20.11), до сабота (23.11) во Македонија под влијание на серија изразени влажни воздушни бранови, ќе има повремени врнежи од дожд, кои локално ќе бидат обилни, поројни и проследени со појава на грмежи.

Повремено, на планините врнежите од дожд ќе преминуваат во врнежи од снег, со што до сабота на овие места ќе се формира и снежна покривка.

Во четврток, а особено ноќта петок кон сабота, и во сабота наутро и претпладне, поради продор на значително постудена воздушна маса од север, врнежите од дожд ќе преминат во врнежи од снег и во повисоките места.

Има услови снежната граница локално, и тоа особено во западните и во северните предели да се спушти од околу, па и под 1.000 метри надморска височина, со што услови за повремен снег ќе има и во повисоките населени места (градови).

Сето ова ќе биде проследено и со засилен до силен ветер од јужен, југозападен и од западен правец, а во сабота ветерот ќе го промени својот правец во северен.

Повремено и локално ветерот ќе достигнува брзина од над 80-90 километри на час, а на планинските места дури и над 100 километри на час.

Токму поради ова, апелираме граѓаните да бидат крајно внимателни, особено каде ги ставаат своите автомобили, односно истите да бидат понастрана од дрвјата.

И во скопскиот регион од утре до сабота ќе има повремени врнежи од дожд, проследени со засилен до повремено силен ветер од југоисточен, а во сабота од северен правец.

Во делови од скопскиот регион, повремено ветерот ќе достигнува брзина од над 70-80 километри на час.

Повремено на околните планини, особено во четврток и во сабота, ќе има врнежи од снег, а во сабота провејување на снег ќе има и во повисоките предели од скопската котлина, особено наутро и во претпладневните часови.

Што се однесува до температурите, утре тие ќе се искачуваат во интервалот од 10 до 19 степени Целзиусови, во четврток ќе биде постудено со температури кои ќе се искачуваат во интервалот од 4 до 13 степени Целзиусови во најтоплите југоисточни предели.

Во петок тие повторно накратко ќе се зголемат и ќе се искачуваат во интервалот од 5 до 13 степени Целзиусови, а во југоисточните предели тие ќе достигнат до околу, или малку над 15 степени Целзиусови.

Во сабота температурите позначително ќе опаднат и ќе се искачуваат во интервалот од 3 до 11 степени Целзиусови, додека во повисоките и планинските места тие ќе бидат до околу, па и под нулата.

Особено студено ќе биде од недела наутро, кога ќе има појава на умерени до јаки мразови и температурите ќе се спуштаат во интервалот од -8 до -1 степен Целзиусов, а особено на високите и планинските места тие ќе бидат и пониски.

Сето ова е поради разведрувањето кое се очекува од сабота навечер и ноќта кон недела.

За време на овие бранови на врнежи, до сабота локално ќе наврне позначително количество на воден талог (над 30 литри на метар квадратен)“.

Спирова С. | Црнобело

фото: Фејсбук, freepik.com