Златко од Виница по ампутација на нозете изоде 5km на маратон: „Ми требаше седумпати повеќе сила од нормалното“

Детали

понеделник, 25 ноември 2024

„Моите 5km ги изодив за 50 минути и 40 секунди. Временските услови не беа идеални, имаше снег и влажна патека, но сè помина без никакви проблеми“, вели Златко Ѓорѓиев за CRNOBELO.com, кој со две ампутирани нозе учествуваше на маратонската трка во Базел и успешно надмина уште еден огромен предизвик.

Златко Ѓорѓиев (38) од Виница скоро 10 години живее во Фулинсдорф, Швајцарија со сопругата и двете деца.

На почетокот на 2023 година, додека бил на работното место, Златко доживеа страшна несреќа, по која му беа ампутирани нозете.

Но, скоро две години подоцна, Златко покажа дека со волја, упорност и позитивна мисла, може да постигне сè.

Тој, со помош на своите физиотерапевти и голема поддршка од семејството, повторно научи да оди со протези на нозете, почна да игра кошарка заедно со други лица кои имаат физичка попреченост, а од пред неколку месеци и самиот почна да вози автомобил.

Но, Златко не застанува тука, па изминатиот викенд повторно „се победи себеси“ и изоде 5km на маратонот во Базел, за време од 50 минути и 40 секунди.

Тој за CRNOBELO.com ни раскажа за ова неверојатно искуство, со кое си докажа дека за него, навистина нема граници:

„Овој натпревар, кој годинава беше 41-ви по ред, се одржува секоја година во Базел, со околу 10.000 учесници од различни категории.

Сè започна како идеја на мојата физиотерапевтка. Иако беше голем предизвик, без двоумење ја прифатив. Сакав да покажам дека границите постојат само во нашите глави.

Не правев посебни подготовки за овој натпревар, бидејќи моето секојдневие е веќе исполнето со физичка активност.

Моите 5 километри ги изодив за 50 минути и 40 секунди.

Со оглед на тоа дека на мене ми е потребна седумпати повеќе енергија од нормалното, ова е огромен успех кој ме изненади дури и мене.

Временските услови не беа идеални, имаше снег и влажна патека, но сè помина без никакви проблеми.

Она што го направи ова искуство уште повредно беше поддршката.

Публиката, случајните минувачи, мојот тим од Agility Plus и моето семејство беа на целта за да ме бодрат.

Тоа чувство на заедништво и успех е нешто што тешко се опишува со зборови.

Во моментов, сум насочен кон прилагодување на мојот професионален пат и немам конкретни активности за иднина, освен оние како досега.

Сепак, мојата физиотерапевтка веќе има планови - наредната година можеби ќе учествуваме во искачување на кањон во кантон Тесин.

Иако сè уште чекаме потврда, возбудата е голема.

Ова искуство е потсетник дека со посветеност и верба можеме да ги надминеме сите предизвици.

Погледнете го видеото од влегувањето на Златко на целта:

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело