Бев на „Зимзоленд“ во Скопје - Што ми се допадна, а што не на нашиот новогодишен базар?

Детали

вторник, 10 декември 2024

Ако очекувате новогодишен базар во стилот на светските метрополи, најверојатно ќе се разочарате. Но, ако одите за да се забавувате, да се напиете греено вино, да се заблажите со мини крофнички или да се возите на некоја од атракциите во забавниот парк, тогаш „Зимзоленд“ ќе ги исполни сите ваши очекувања.

Веќе неколку дена паркингот на спортскиот центар „Јане Сандански“ е најпосетеното место во Скопје.

Причината за тоа е новогодишниот базар „Зимзоленд“: куќички со кафе и греено вино, сендвичи и мини крофнички, штандови со шеќерна волна и пуканки, но и карамелизирани јаболка, лизгалиште, лунапарк, детска работилница и голема новогодишна елка...

Ако на тоа се додаде и музичката програма со најавените концерти, тогаш ова е местото кое барем еднаш мора да го посетите пред празниците.

Па, за да не бидам покусо, викендов го искористив за кратка прошетка дотаму, со сестра ми и внука ми.

Поминав повеќе од еден час на „Зимзоленд“ и мора да признаам дека не си поминав лошо.

Напротив, се опуштив од секојдневните обврски и уживав и покрај гужвата и дождот кој росеше (а поради кој таа вечер беше откажан концертот).

Првата помисла ми беше дека нема да можам да најдам место за паркинг, но успеав „од прва“.

Додека по паркингот се движев кон „Зимзоленд“, сфатив дека луѓе цело време доаѓаа и си одеа, па самото паркирање и не е некаков проблем.

Имаше и автомобили од соседните градови, па се чини дека идејата да се направи празнично катче во Скопје, е навистина успешна (барем за сега).

Кога се приближивме до куќарките со храна и пијалаци, јас тргнав накај виното, внука ми накај крофничките, а сестра ми кон кафето - секоја со своите желби.

Полека одевме кон забавниот парк и десетината атракции.

Додека се движевме низ толпата, од една страна се слушаа среќни извици, а од друга врисоци - зависно кој на какво „возење“ беше.

Каде и да се свртев имаше родители со мали деца, тинејџерски друштва, возрасни луѓе кои уживаа во атмосферата и покрај студеното време.

Добро, факт е дека имаше премногу гужва за мој вкус, но не очекував ништо помалку.

Дури и успеавме да се сликаме покрај елката без да претрчуваат луѓе пред нас (мала победа).

Освен турканиците за автомобилчиња (кој ќе си фати - негово е) и тоа што немаше никаков ред за мини крофничките, па луѓето што чекаа буквално се газеа за да стигнат на ред, имам само уште една замерка, а тоа е лизгалиштето.

Мразот беше растопен, „разгазен“, а децата делуваа како да им е тешко да се лизгаат на него.

Освен тоа, би рекла дека „Зимзоленд“ е супер идеја во градот во кој скоро и да нема ништо накитено и не владее празнична атмосфера.

И иако не наликува на новогодишните базари во светските метрополи, факт е дека нуди многу забава за сите генерации.

Па ако деновиве патот ве одведе накај Аеродром, посетете го „Зимзоленд“. Ако ништо друго, барем за да направите некоја празнична фотка.  

Погледнете повеќе фотографии на следната страница...