„Преку нив газеле други деца, на раце изнесувале другари“ - Д-р Нико Беќаровски споделува потресни сведоштва од преживеаните

Детали

среда, 19 март 2025

„Рани на младите недолжни души...Раскажуваат низ солзи, како преку нив газеле други деца бегајќи од пламените, како топлината им го горела ждрелото, како чучнати во вецето го чекале судниот момент... Ноќните кошмари уште долги години ќе бидат нивен несакан ноќен придружник“ - вели во својата Фејсбук објава д-р Нико Беќаровски, за повредените кои се хоспитализирани на Клиниката за токсикологија. 

По страотниот пожар кој се случи во дискотеката во Кочани, во кој 59 лица го изгубија животот, повеќе од 100 лица се повредени и хоспитализирани во нашите клиники, но и во многу други земји кои ја понудија својата помош. 

Доктор Нико Беќаровски од Универзитетската клиника за токсикологија, на својот Фејсбук профил напиша трогателно сведоштво од она што им го раскажале пациентите кои се хоспитализирани таму. 

Оние кои се во подобра состојба, се среќни што успеале да се спасат, но никогаш нема да ја преболат загубата на своите блиски, ниту да ги избришат од глава сликите од таа ноќ, кои ги демнат постојано. 

Објавата на Фејсбук на доктор Нико Беќаровски, во целост гласи: 

РАНИ НА МЛАДИТЕ НЕДОЛЖНИ ДУШИ

На Универзитетската клиника за токсикологија хоспитализирани се дваесетина млади страдалници од хоророт кој го доживеаа во таканаречениот кабаре бар.

Од една страна среќни што сепак извлекле жива глава, задоволни што поминале со некоја полесна изгореница, сe уште со по некој гареж во нивните гради.

Но секој од нив има своја траорна приказна за ужасот кој го доживеале тие 10-30 минути.

Раскажуваат низ солзи, како преку нив газеле други деца бегајќи од пламените, како изнесувале на своите раце изгорени и јагленисени свои другари, како мирисот на изгорено човечко месо им ги парал ноздрите, како топлината им го горела ждрелото, како чучнати во вецето го чекале судниот момент и уште многу други лични трауми кои ги погодија овие прекрасни млади личности.

Тие раскажуваат, нас солзите сами нѝ навираат.

Ова се дваесетина индивидуални драми, но секој од тие петстотини невини фиданки, има своја приказна, своја лична траума. Драми кои не може да ги креира ниту Холивуд.

Физичките трауми ќе зараснат или ќе остават трајни физички дефекти, но душевните трауми уште долго или доживотно ќе бидат нивен следбеник.

Ноќните кошмари уште долги години ќе бидат нивен несакан ноќен придружник.

ЗОШТО ???

„За туѓи бели дворови,
копај си црни гробови“

М. М. | Црнобело