Таско за децата: „Синот учи од постапките на таткото, ќерката си создава слика каков маж заслужува“

Детали

петок, 09 мај 2025

„Сфатив дека јас секогаш сум учел преку пример, не преку збор. Сфатив и дека децата не ги слушаат само зборовите - тие ги впиваат постапките, енергијата, ставовите. А за едно дете, таткото е првиот херој“, вели Таско, кој има син и ќерка.

Раперот Христијан Тасковски Таско, кој од Нова година сврте нов лист во животот и почна да го менува на подобро, со секој измина месец, јавно зборува за својот напредок, за промените кои ги прави и работите во кои се труди да е подобар.

Откако зборуваше за борбата со алкохолот и своите демони, но и вежбањето како одличен начин да се посвети на себе, сега, се осврна на татковството, односно на своите син и ќерка, па откри што научил како татко, но и каков татко сака да биде.

Тој вели дека децата учат од примерот кој го гледаат пред себе, па на Инстаграм сподели видео на кое си игра со својот скоро 2-годишен син, Лукијан.

Во пораката на видеото, Таско напиша:  

„Пет месеци чисто и здраво тело, ум и дух. Гледајќи го клипов почнав да размислувам каков татко сум јас.

Сфатив дека јас секогаш сум учел преку пример, не преку збор. Па, оттука и тргнав кон учењето на моите деца.

Сфатив дека децата не ги слушаат само зборовите - тие ги впиваат постапките, енергијата, ставовите.

За едно дете, таткото е првиот херој, првиот водач, првиот пример за тоа каков треба да биде човекот.

Синот гледа во татко му и тивко си вели: „И јас сакам да бидам како тато“. Гледа како оди, како зборува, како се однесува со мајка му, како се справува со проблемите.

Секој потег е лекција. Секое молчење или збор - порака. Синот учи како да биде маж преку тоа каков маж е неговиот татко.

Ќерката, пак, низ однесувањето на таткото учи што значи љубов, грижа, почит.

Таа несвесно си создава слика за тоа каков маж заслужува еден ден. Ако таткото е добар, присутен, чесен и силен со срце, таа ќе бара некој како него.

Таткото е жив пример. Затоа, не дозволувај други луѓе, екрани или друштва да бидат пример за твоето дете.

Биди ти тој. Облечи се со достоинство, зборувај со мудрост, постапувај со љубов, давај му мотивација и секогаш запомни - некои мали очи те гледаат и мали срца те следат.

Ти си татко. Биди херојот кој твоето дете заслужува да го гледа секој ден. Каков татко си ти?“

Погледнете го видеото:

Прочитајте и Таско за татковството: „Најстресно ми беше кога Лукијан првпат се разболе“