Затвореничките од Идризово имаат шивачка работилница, а наша дизајнерка сега им ги промовира делата и на Инстаграм: „Веземе надеж“

Детали

вторник, 01 јули 2025

„Нивниот секојдневен живот, без содржина и шанса за раст, ме натера да понудам алатки и вештини за подобра иднина“, вели Ирина Тошева за затвореничките во КПУ Идризово. Иницијатива за поздрав!

Дизајнерката Ирина Тошева ја воодушеви јавноста со нејзината иницијатива на почетокот на 2025-та за отворање на шивачка работилница за жените од КПУ Идризово.

Од идеја до реализација, Ирина успеа во овој сон и вели дека сега со затвореничките везат надеж и шијат промени.

Нивните дела отсега ќе ги има и на Инстаграм профилот @madeinidrizovo.

Ирина ја објави оваа убава вест на социјалните мрежи:

„На почетокот на 2025 започнав иницијатива за создавање шивачка работилница за жените од КПУ Идризово.

Нивниот секојдневен живот, без содржина и шанса за раст, ме натера да понудам алатки и вештини за подобра иднина.

Со донации од граѓан(к)и и компании, успеавме да ја опремиме работилницата и да создадеме пристојни услови за учење и работа.

Прво учевме да веземе. Потоа почнавме да шиеме.

А денес на Инстаграм ви ја претставуваме @madeinidrizovo - наша заедничка платформа каде ќе ги споделуваме производите, инспирацијата и сите убави нешта што се раѓаат таму каде што некогаш имало само тишина.

Веземе надеж. Шиеме промени.

Заследи нѐ: instagram.com/madeinidrizovo“.

Инаку, во мај 2025-та Ирина ги објави првите дела од вредните раце на затвореничките и напиша:

„Првите производи создадени во шивачката работилница во КПУ Идризово се појавуваат јавно, на модната ревија на кучиња во склоп на „Вдоми Љубов Фест“.

Создадовме бандани со мотиви на тема вдомување. Со нивно купување, директно ни помагате да набавиме опрема и алатки што ни недостигаат, за да продолжиме да учиме и создаваме.

Спојуваме две каузи одеднаш: вдомување животни и реинтеграција на жени“.

С. С. | Црнобело