Наша докторка, семеен психотерапевт: „Партнерот не треба да ви е на второ место по децата, ако чекате да пораснат – ќе станете странци“

Детали

среда, 20 мај 2026

„Постои верување дека најважната улога во животот ни е родител, најважното суштество во животот ми е детето... Си велам, Боже Господе, како да им помогнам на луѓево да разберат дека има некои улоги кои не се споредуваат? Како да ни се партнерите само за приплод, па ние стануваме родители и веќе не сме важни едни на други“ - наша докторка зборува за семејните односи, но и периодите во кои паровите најчесто се разведуваат. 

Во емисијата „Телма Амбуланта“, кај Марија Атанасовска, гостуваше примариус д-р Славица Гајдаѕис Кнежевиќ, невропсихијатар и сертифициран семеен и системски психотерапевт.

Во гостувањето, тие разговараа за една актуелна тема за која можеби недоволно се зборува во јавност, а тоа е семејството зад затворени врати.

Социјалните мрежи покажуваат совршени семејства, но во домот ситуацијата е сосема поинаква, паровите се соочуваат со поразлични предизвици во ова модерно време, а докторката објаснува кои се најчестите проблеми.

Помеѓу многуте теми за кои зборуваа, една посебно го привлече вниманието на јавноста, а тоа е дека партнерскиот однос не смее да биде на второ место, по децата.

Д-р Славица објаснува:

„Постои верување дека најважната улога во животот ни е родител, најважното суштество во животот ми е детето...

Си велам, Боже Господе, како да им помогнам на луѓево да разберат дека има некои улоги кои не се споредуваат? Може на прво место да ви е и партнерот и детето, ама на различен начин.

Како да ни се партнерите само за приплод, па ние стануваме родители и веќе не сме важни едни на други.

Добро е да знаат партнерите дека веќе после првата, втората година максимално, треба да размислуваат, кај сме ние, што сме ние, имаме ли малку време, да ги обновиме сеќавањата на нашиот партнерски однос.

Ако чекаат да поминат 10-15 години, децата да пораснат, одеднаш ќе се најдат како странци.

Статистиката вика дека најголем број бракови се разведуваат после прва година, тоа се оние партнери кои брзо донесуваат одлуки, немале време, не профункционирал бракот туку било набрзина.

Потоа седмата година од бракот, кога ќе тргнат децата во училиште, па на неколку часа се растеретуваат обврските, бидејќи се во друг систем децата.

И потоа во период на адолесценција, на 15-16 години, кога децата се осамостојуваат и не сакаат веќе мајки како хеликоптери да ги облетуваат, најчесто мајки, меѓутоа и татковци.

И одеднаш ние не знаеме што да правиме со себе...“

Погледнете го целото гостување: 

М. М. | Црнобело