Росана Сариќ револтирана: „Жена во нашата зграда собира смет и го запали - полиција влезе насилно во станот“

Детали

петок, 22 мај 2026

„Во нашата зграда живее сама жена, живее во смет. Смрдеата е неподнослива, посебно сега кога времето се затоплува. Завчера го запалила сметот во станот, што значи дека претставува и опасност по безбедноста на сите станари“, напиша Росана Сариќ Тодоровска, во надеж дека некој ќе најде решение за проблемот.

Пејачката Росана Сариќ Тодоровска, која е дел од нашата музичка сцена повеќе од 40 години, важи за дама која публиката ја обожава.

Кротка, сталожена, насмеана, позитивна, Росана е миленичка на публиката од сите генерации.

Но, поттикната од случка во зградата во која живее со сопругот, актерот Ѓорѓи Тодоровски - Трупче, таа јавно го изрази својот револт на Фејсбук.

Росана откри дека во нивната зграда, која е 18-катница, живее жена која собира секаков смет и во станот и во автомобилот, и дека од сметот се шири неподнослива реа. Ова, вели пејачката, може да предизвика и болести.

Жената пред неколку дена го запалила сметот во својот стан, поради што морала да интервенира полицијата и насилно влегла во станот.

За непријатната ситуација, од која за сега не успеваат да најдат решение, Росана на Фејсбук напиша:

„Еве, ние во Карпош 4, во зграда на ‘Никола Парапунов’ дојдовме до лавиринт…

Во нашата зграда живее жена, сама, дотична Х. Живее во смет и со смет во нејзиниот стан.

Смрдеата или ареа, како и да е, е нешто што е навистина неподносливо, посебно сега кога веќе времето се затоплува.

Дотичната Х, сметот во кој живее го собира во станот, а истиот го собира и во нејзиниот автомобил и скоро секојдневно поминува затворена во истиот по некои 3 часа.

Завчера, дотичната Х си го запалила сметот во својот стан, што значи дека навистина претставува опасност по општа безбедност на сите станари во зградата.

Полицијата дојде и влезе насилно, но наводно, тие само направија записник и нивните ингеренции се до тука…

Пред повеќе од 1 година реагирано е до Општина Карпош, каде добивме одговор дека и тие не можат ништо освен најблиските роднини на дотичната Х да реагираат и да пријават дека истата таа не е во ред, односно има здравствени проблеми а понатаму да можат институциите да постапат онака како што треба.

Дотичната Х не сака и нема никаков контакт со нејзините блиски.

Ајде сега, што да се прави и која институција треба да го реши проблемот кој воопшто не е за занемарување?

Треба ли повторно да се случи пожар за недај боже да има и жртви, треба ли и понатаму да живееме со неподнослива миризба која носи и зараза?

Има ли пилот во авионот? Има ли закон за заштита од болни луѓе по зградиве, и до кога заради една болна личност треба да молчи цела зграда од 18 ката?“

А. Ј. | Црнобело