Дарко Панчев наполни 60 години - Златна топка и две торти за роденденот на фудбалската легенда

Детали

вторник, 09 септември 2025

„Пред 60 години се роди најголемата спортска легенда на Македонија и најпознатиот Македонец во светот. Да си ни жив и здрав“ - напиша неговата сопруга, пејачката Маја Гроздановска Панчева.

Еден од најдобрите македонски фудбалери на сите времиња, Дарко Панчев наполни 60 години.

Роденденот го прослави со најблиските, кои објавија фотки на Инстаграм.

Дарко овој пат имаше две роденденски торти. Едната со декорација чаша виски и пури, а другата црна и со златна топка - синоним на златната копачка што ја освои во времето кога играше за „Црвена ѕвезда“.

„Пред 60 години се роди најголемата спортска легенда на Македонија и најпознатиот Македонец во светот. Да си ни жив и здрав“ - напиша неговата сопруга, пејачката Маја Гроздановска Панчева.

Дарко е роден на 7 септември 1965 година и е вистинска легенда на југословенскиот и македонскиот фудбал.

Во 1992 година тој ја освои Златната копачка на Европа, играјќи за Црвена ѕвезда.

Кариерата ја почна во младинските категории на Вардар, а во 1988 година замина во белградска Црвена ѕвезда.

Со клубот трипати по ред ја освои југословенската лига и беше најдобар стрелец, а во сезоната 1990/91 го постигна решавачкиот пенал во финалето од Купот на европските шампиони против Олимпик Марсеј.

Истата сезона со 34 голови стана најдобар стрелец во Европа, но наградата ја прими дури во 2006.

Потоа го освои и Интерконтиненталниот куп, давајќи му гол и на чилеанскиот клуб Коло-Коло.

Од Ѕвезда во 1992 година замина во Интер, а потоа кратко играше за Лајпциг, за Фортуна, а се пензионираше во 1997 во дресот на швајцарски Сион.

За репрезентацијата на Југославија настапи на 27 натпревари и постигна 17 голови, вклучувајќи два на Мундијалот во Италија во 1990.

Тој беше прв капитен на Македонија, а во националниот дрес настапи на 6 натпревари и постигна еден гол.

А. Ј. | Црнобело