Јутјубер од Лондон ги истражува земјите од поранешна Југославија со само еден денар во џеб

Детали

среда, 10 декември 2025

„Со овој серијал се надевам дека ќе ги покажам различните држави и култури, како и прекрасните луѓе кои постојат во овој регион“, вели за CRNOBELO.com Ричард од Лондон кој неколку месеци живее во Скопје, а сега е на пат низ земјите од Балканот, со само еден денар во џеб.

Ричард Хејвард од Лондон, Велика Британија, веќе неколку месеци живее во Македонија.

22-годишниот Британец има и свој Јутјуб канал – SideQuestMerchant – и вели дека сега е посветен на правење видеа тука, во Македонија.

Претходно, во интервју за CRNOBELO.com, Ричард зборуваше за одлуката да се пресели во Македонија, а сега, пак, ни раскажа за неговиот нов подвиг – да ги истражи земјите од поранешна Југославија.

За неговиот нов серијал на Јутјуб и Инстаграм, Ричард одлучи да го напушти својот дом во Скопје, со ништо освен облеката на него и само еден денар во џеб.

Вели дека нема да се врати назад сè додека не стигне до Словенија и не ја посети секоја престолнина на земјите од поранешна Југославија.

Новиот серијал на Ричард ги следи авантурите што ги доживува секојдневно – од снежната бура што го затекнала во Косово на вториот ден од патувањето, преку спиење во напуштени згради во Црна Гора, до средбата со познати инфлуенсери во Србија, како Лука Обрадовиќ и Wajwai.

За да може да преживее, Ричард црта слики за кои добива парични донации, препродава пијалаци, но и секакви ситници – од пенкала до дуксери и, генерално, се потпира на добрината на луѓето.

Кликнете на објавата за да го изгледате видеото:

Тој ја покажува и добрината и гостопримливоста на локалците, а и во коментари доминираат пофалбите за дарежливоста на луѓето што ги сретнува по пат.

„Со овој серијал се надевам дека ќе ги покажам различните држави и култури, како и прекрасните луѓе кои постојат во овој регион.

Колку се различни животите на луѓето овде, но исто и сличностите со луѓето од целиот свет. Се надевам дека на гледачите ќе им се допадне“, вели Ричард за CRNOBELO.com.

Повеќе видеа од авантурата на Ричард:

Сите видеа можете да ги изгледате на Јутјуб каналот на Ричард.

Погледнете и: Ричард (22) од Лондон се пресели во Македонија: „14 пати доаѓав тука, пред да одлучам да живеам во вашата фантастична земја“

Спирова С. | Црнобело