Миа Костова - YSL, Илариа Кирилов мирис што ја потсетува на свекрвата - Омилени парфеми на нашите инфлуенсери

Илариа Кирилов

„Мојот омилен парфем е Kilian Angels’ Share. Го користам веќе околу три години и сè уште ми е апсолутен фаворит.

Овој парфем ме потсетува на мојата свекрва, бидејќи има топла, елегантна и софистицирана нота што за мене симболизира сигурност, женственост и семејна блискост.

Мирисот на цимет, ванила и коњак ми буди спомени на топли моменти, празници и убави разговори.

Токму затоа ми е толку посебен, не е само парфем, туку емоција и спомен што го носам со себе“.

Нина Ред

„Парфемот за мене е силно чувство, еден невидлив потпис што останува и кога ќе си заминам.

Секогаш бирам парфем со силна трага и не е за да им се допадне на сите, но останува таму каде што навистина припаѓа. Затоа избирам интензивни ноти, бидејќи и јас верувам во работи што не се површни, туку трајни.

Еден од нив е Nishane, линија парфеми кои не мирисаат „како сите други“, оставаат силен впечаток и во просторот мирисната нота ја чувствуваш како личност, не како парфем. 

Нивното мото е според Руми: „Не живеј според туѓи приказни - создај ја својата“.

Затоа мирисите се чувствуваат многу лично и емотивно. Кога ќе го нанесам на мене, знам дека сум подготвена да го освојам светот.

Уште еден интезивен парфем кој го обожавам е Baccarat Rouge 540.

Парфемот е „невидлив луксуз”, нешто што се чувствува, а не се гледа. Kurkdjian дефинитивно сакал да создава мириси што се чувствуваат како „втора кожа” на себе.

Многумина велат дека мириса како нешто што не можеш точно да го именуваш, како чувство што си го живеел еднаш и останало во тебе.

Дефинитивно ме потсетува на преубавите летни вечери.

Негова спротивност е дефинитивно YSL Libre Intense. Овој парфем зборува за личност што има силна женственост, е самоуверена, сака внимание, но не го барa и има енергија на лидер.

Libre Intense мириса како жена што знае дека слободата не е да бегаш, туку да стоиш цврсто таму каде што си.

Утринско сонце, кафе, слушалки, добра музика, уште подобар аутфит и како завршница парфем од YSL. Денот може да започне!“

Александар Динев

„Омилен парфем ми е YSL MYSLF Le Parfum и го користам скоро цела година.

Мирисот е многу освежувачки!

Посебен ми е затоа што кога го носам се чувствувам средено и сигурно во себе, без разлика дали сум на состанок, на настан или околу пријатели“.

Сандра Кирков

„Само еден? Ајде ќе го одвојам Boucheron Iris de Syracuse.

Ми се допаѓа поради неговата елегантна и софистицирана нота на ирис, која делува многу суптилно, а сепак остава впечаток.

Го користам повеќе од 10 години и секогаш му се навраќам.

Ме потсетува на убави моменти, буди некое чувство на носталгија и топлина, како да ме враќа во некои убави периоди од животот.

Се чувствувам многу пријатно и некако баш „своја“.“

Стефан Лазаров

„Омилен парфем ми е Gentleman Givenchy и го користам неколку години.

Многу ѝ се засвиѓа на Марта, па така некако спонтано си дојде да го купувам често и да го користм, но секако и мене ми стана омилен“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело