Сара од Битола е томпалевска снаа во Лазарополе: „Видовме мечка со сопругот, тој ja сликаше, селото е магично“

Детали

среда, 27 мај 2026

„Пред некој ден, кога си одевме од Лазарополе и после Меривичина краста, свекрва ми свика: ‘Мечката’, јас онемев, мислев веќе заминала и пак не ја видов, ама тука беше како што можете да видите на фотографијата“, вели Сара од Битола, томпалевска снаа во Лазарополе, за CRNOBELO.com.

Сара од Битола е томпалевска снаа во Лазарополе и вели дека секој слободен миг го користи за да го посети селото, а и едвај чека да се пензионира за да живее таму.

Па, така неодамна при посета на Лазарополе, Сара и сопругот имале среќа да видат мечка, а и да го овековечат моментот.

Сара слушнала дека има мечиња периодов таму и буквално ги барале.

Сара за CRNOBELO.com вели:

„Од првиот ден кога дојдов во Лазарополе знаев дека ќе го сакам како да сум таму родена.

Домот на дивите животни им е во планина, нас ни е чудно, интересни ни се, а може и се плашиме, но кога ќе ги видиме имаме друга мисла за нив - сфаќаме колку се убави и нереални.

Кога се блиску до нас, веднаш се фаќаме за телефони, да сликаме, да снимиме, ретко се случува да ги видиме, па барем спомен да остане.

Од кога првпат известија во групата „Лазарополе“ дека има мечиња, јас бев окупирана со патувањето до Лазарополе.

Гледав, пратев, за да ја видам исто како што велат што е твое ќе си дојде.

Но, пред некој ден, кога си одевме од Лазарополе и после Меривичина краста, свика свекрва ми: „Мечката“, јас онемев мислев веќе заминала и пак не ја видов, ама тука беше како што можете да видите на фотографијата.

Мечката си уживаше и ептен блиска средба имавме, мажот ми веднаш ја сликаше, преубава глетка навистина...

Фото: Фејсбук група „Лазарополе“

И самото Лазарополе е една разгледница, тие сцени само во главата се врежуваат.

Свекор ми е од Лазарополе по потекло. Растел со баба му и дедо му во Лазарополе и често ни раскажува за мијачкиот дел, па ние како помлада генерација се трудиме да ја зачуваме традицијата што ни ја предале.

Премногу го засакав селото и одвај чекам да се пензионирам за да живеам во Лазарополе, како што вели во песната: „ТАМУ ДА СИ ОДМОРАМ ДУША ЕЈ ПРЕМОРЕНА“.

Откако го посетувам Лазарополе повеќе имам желба за природа и почнувам сè повеќе да ја сакам убавината на природата и животните. Уживам во мирот, воздухот и некако како да сум поблиску до ѕвездите и сонцето оти сепак Лазарополе е таму најгоре.

Би сакала да ги поттикнам сите што сакаат да уживаат во природа да го посетат Лазарополе, па и цела недопрена природа во Македонија, па може ќе сретнат и некое мече“.

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело