Полуматуранти од скопско училиште со кул видео: „Првпат влеговме со ранци поголеми од нас, сега излегуваме повисоки и похрабри“

Детали

среда, 10 јуни 2026

Кул видео од скопско училиште - влегуваат во училница како првоодделенци, излегуваат како полуматуранти: „Некогаш со ранци поголеми од нас и со очи полни љубопитност зачекоривме низ училишната врата за првпат. Денес, девет години подоцна, излегуваме од неа повисоки, похрабри и побогати за безброј спомени“. 

Во последно време, многу почесто гледаме кул иницијативи од училиштата во нашата земја, како убаво уредени дворови и забавни видеа со првачиња кои ги испраќаат полуматурантите.

Сега на социјалните мрежи се појави уште едно интересно видео, направено од полуматуранти на ООУ „Лазо Ангеловски“ во Скопје.

Учениците од IX-3 направиле креативно видео, на кое првачиња (кои треба да ги претставуваат нив пред 9 години) влегуваат во училница, а потоа полуматурантите излегуваат од истата училница и ја затвораат вратата.

Во описот стои нивниот емотивен текст:

„Некогаш со ранци поголеми од нас и со очи полни љубопитност зачекоривме низ училишната врата за првпат. Денес, девет години подоцна, излегуваме од неа повисоки, похрабри и побогати за безброј спомени.

Mеѓу овие ѕидови пораснавме, другарувавме, учевме да победуваме, но и да стануваме по силни по секој предизвик. Времето тивко леташе, а денес остануваат насмевките, прегратките и моментите што засекогаш ќе живеат во нашите срца.

Основното училиште завршува, но приказната на IX³ што ја создадовме заедно ќе трае вечно“.

Погледнете го видеото:

M. M. | Црнобело