Како се станува STUBRAND во Македонија?

Детали

понеделник, 02 ноември 2015

Првото истражување на STUBRAND во Република Македонија се реализираше во периодот од 15 септември до 1 октомври оваа година. Резултатите од истражувањето се содржани во специјално подготвен извештај во кој покрај податоци за имиџот на секој од 291 брендови, се наоѓаат и споредбени анализи на имиџот на брендовите во секоја од 19те категории.

Што го прави STUBRAND поразличен од останатите иницијативи од овој тип?

STUBRAND е уникатен и поразличен од постоечката конкуренција на македонскиот пазар од две клучни причини. Прво, целната група која директно ги избира и промовира омилените брендови се студенти (односно млади лица на возраст од 18-27 години) кои се многу значајна потрошувачка група и сега, но уште повеќе и во иднина. Токму затоа, пораката на STUBRAND е „Креирајте вистинска лојалност кон брендот кај студентите денес, и задржете ја засекогаш!“. Втората разлика произлегува од уникатноста на методологијата и употребената Ликертова скала за мерење на личната перцепција или имиџот на брендот кај студентите, при што од нив се бара со кликање на една од понудените опции: Love, Like, Neutral, Dislike, Hate и Don’t Know, во најбрз можен рок да ја искажат, првичната и најбрза (импулсивно-емотивна) реакција поврзана со конкретниот бренд.

Зошто баш оваа скала?

Одлуката за изборот на тн. “D-T (Delighted-Terrible) скала” или во конкретниот случај “L-H (Love-Hate) скала” е направена бидејќи е најсоодветна за мерење на интензитетот на чувствата/емоциите на клиентите, те. за степенот на нивна емотивна приврзаност кон брендот. Оваа констатација е поткрепена со многу истражувачки студии кои го потврдиле фактот дека постои голема разлика помеѓу зборовите Love (сакање, обожавање, воодушевеност и сл.) и Like (допаѓа). Или, отценката Like многу повеќе се поврзува со умот (рациото) на потрошувачите, а зборот Love со нивните емоции, воодушевеноста и сл. (тн. “Wow ефект”). Сличен заклучок, само во негативен контекст, важи и за значењето на зборовите Dislike и Hate.

Притоа, збирниот процент од одговорите на сите испитаници се класифицира во четири категории: позитивен имиџ (вкупен процент испитаници кои одговориле со Love и Like), неутрален имиџ (вкупен процент испитаници кои одговориле со Neutral), негативен имиџ (вкупен процен испитаници кои одговориле со Dislike и Hate) и непознат (вкупен процент испитаници кои одговориле со Don’t Know).

Како се одредува кој бренд го добива признанието STUBRAND за конкретната година?

Имајќи го во вид претходното, брендовите со позитивен имиџ над 50% добиваат признание за STUBRAND, додека пак брендовите со позитивен имиџ над 75% и процент на Love одговори поголем од Like одговори, се стекнуваат со признанието за PREMIUM STUBRAND за конкретната година. Всушност, тоа се брендови кај кои има најголем степен на емотивна приврзаност кон брендот кај оваа целна група потршувачи, што всушност е и крајна цел на процесот на брендирање.

Покрај досегашните објави во дел од медиумите, во овој момент може да се каже дека официјално со признанието за PREMIUM STUBRAND за 2015 година се стекнаа брендовите Стоби Флипс, Атлантис, Антена5, итн., а со признанието STUBRAND се стекнаа Зегин, crnobelo.com, 24 Вести, итн. Тука може да се напомене дека има и компании како на пример Битолска млекара, Алакалоид, Прилепска пивара, Swisslion, Скопска пивара, итн. кои покрај тоа што имаат позитивен имиџ на нивните компаниски брендови, исто така имаат и позитивен имиџ за повеќе од еден од нивните производни брендови. Официјалното доделување на признанијата ќе се одржи на свечен настан во средината на декември кај воедно ќе биде и можност за вмрежување на студентите кои учествуваа во истражувањето, како и најуспешните студенти (членови на НАПАГ) со најуспешните компании – сопственици на брендовите.