Убавина која не се опишува со зборови: искачување на Јелак, Шар Планина

Детали

четврток, 16 февруари 2017

Новото Планинарско-еколошко друштво „Gardians of Nature - I Love Hiking group Macedonia“ изминатата недела под мотото #ИзлезиИДиши на Шар Планина во посета на Јелак и Јелачки Црн врв 1873m надморска височина, донесе голема група на учесници. Бројката на планинари достигна скоро стотина, од почетници до професионалци, меѓу кои најмалиот учесник имаше само девет години.

Турата започна од местото Попова Шапка каде поголем дел се движевме по колски пат односно пат направен од ратрак. Времето утрото на почетната точка беше магливо и тмурно иако бевме на висина од скоро 1700m надморска височина. Но, тоа не внесе негативна енергија кај учесниците, бидејќи знаевме дека со самото искачување погоре не чека излез од еден и влез во друг свет на природата, со чисто небо, силно сонце и раскошни пејзажи од убавата Шар Планина.

Убавините и магијата на Шара нема човек кој може да ги опее, нема човек кој ќе се нафати да ја скроти макар и со збор Шара, а камо ли напише и опише. Се пешачеше малку повеќе од 2,5 часа во еден правец поради мекиот снег кој го имаше апсолутно насекаде. Движењето беше низ прекрасна шума од ели со многу снег на нив - вистинска зимска идила.

Крајната цел беше Јелачки Црн Врв 1873m надморска височина на кој мал дел од групата не се искачи. Тие што дојдоа до врвот на едноставен начин им беше кажано: еве зошто доаѓате тука, ајде пуштете го погледот! Нека ве носи до бескрај и не трепнувајте, уживајте и радувајте се! И се така, до бескрај со неа.

Турата беше претходно добро организирана и координирана од тимот на „I Love Hiking - group Macedonia“, немаше несакани инциденти и се заврши во посакуваната насока предвидена од тимот.

На следниот ЛИНК ќе може да ги погледнете сликите од оваа прекрасна тура организирана од „I Love Hiking - group Macedonia“.

Иницијатива #ИзлезиИДиши е за обичниот човек кој со сите свои работни обврски, модерниот начин на живот, буквално е затворен меѓу четири ѕидови. Со самото тоа забораваме правилно да дишеме. А да не зборуваме за загаденоста на воздухот и размената на сите видови вируси овој период.

#ИзлезиИДиши воедно е и мерка против загаденоста во Скопје и другите поголеми градови.

Чистиот воздух го имаме на нашите планини – кои се ⅔-ни од нашата земја.

#ИзлезиИДиши се кратки мали тури каде се сите поканети на рекреација и запознавање како со нас така и со природата.

Нашата дружба е горе, на отворено, во природа. А, дружбата на отворено и во природа е најздравата работа што можете да си ја дозволите.

Додека ги правиме овие тури во нив имплементираме и тури за поискусни, на кои планината им е веќе како втор дом. Така сите заедно поминуваме еден до два дена во неделата. Препреки нема, освен опремата која понекогаш е неопходна, ама во пролетниот и летниот период е потребна само желба.

Повелете контактирајте нè и дојдете на една дружба на отворено и во природа.

Воедно, сакаме да ве поканиме и на нашата следна средба на планина Шар Планина- врв Љуботен. Турата ќе се одржи на 19-ти февруари и повеќе информации можете да добиете на следниот ЛИНК.

И секако, турата за почетници која ќе биде на Бесна Кобила во Србија на 26-ти февруари. Повеќе информации за оваа тура ќе добиете наскоро.