Како се склучува зделка од илјадници евра на кафе?

Детали

четврток, 24 август 2017

Ова не се трикови наменети да ве анимираат додека го пиете вашето кафе, туку реални совети врз база на искуство од агентите кои работат во македонската канцеларија на глобалниот лидер во светот на недвижностите, Century 21.

Во бизнисот со недвижности секој контакт со клиент е потенцијално посредство во зделка од илјадници евра, која и за вас ќе обезбеди поголем приход. За луѓето да ви ја укажат довербата да го водите овој процес, ќе треба да демонстрирате максимална професионалност.

„Понекогаш едно кафе е единствената шанса која ја имате за остварување соработка – искористете ја максимално.“ Ова е првиот и најважниот совет кој ќе треба да го запомните. Ова се следните:

1. Работете на сопствениот маркетинг

„За да ви се укаже можноста да седнете на кафе со потенцијален клиент, тој мора да има некаква претстава за вас. Иако зад нас стои светски позната, стабилна компанија, секој од нас работи самостојно на промовирање на нашите услуги и достигнувања. Нема да постигнете многу ако се држите само до репутацијата на компанијата за која што работите. Вие сте професионалец со име и презиме кое вашиот соговорник треба да го знае. Освен нашите визит карти, ги користиме можностите кои нѝ ги нудат социјалните медиуми за да се промовираме.“    

2. Демонстрирајте кредибилитет

„Закажете состанок во првиот слободен момент кој го имате и бидете таму на време, покажете почит кон потребите на клиентот. Штом ќе ги слушнете, веднаш тргнете во потрага по најдобрите решенија за да обезбедите беспрекорна услуга. Бидете ефикасни и истрајни во потрагата. Штом ќе имате што да понудите, закажете состанок со другата страна и активно учествувајте во преговорите. Ваша обврска е да се изборите за најдобри услови за вашиот клиент.“  

3. Поставувајте прашања

„Не се плашете да поставувате прашања. Тие ќе му покажат на клиентот дека сте навистина посветени кон пронаоѓање на идеално решение за него, а вам ќе ви помогнат да ги разберете неговите потреби. Не тргувате со ѕидови, туку со простор кој има емоционална вредност за едната страна, а треба да обезбеди задоволство и можност за среќна иднина за другата. Покажете дека сте свесни за тоа.“

4. Фокусирајте се на квалитетот на решенијата, не на квантитетот

„Не се обидувајте да најдете многу решенија. Евалуирајте ги добро понудите кои сметате дека се соодветни пред да му ги презентирате на клиентот, а потоа претставете ги само оние кои се вистински релевантни за него. Но, направете го ова во најкраток рок. Не го оставајте клиентот да чека. Покажете почит кон неговите потреби. Ако ве праша за совет бидете подготвени да ги претставите и позитивните и негативните страни на секоја понуда. Не се обидувајте да ја подметнете онаа која ќе донесе најголема заработувачка за вас, а не е најсоодветна за барањата на клиентот. Ќе го почувствува тоа и ќе ја изгубите довербата што ја градевте, а и можноста да бидете препорачани како доверлив партнер понатаму.“

5. Оправдајте ја довербата

„Склучувањето на договор за соработка е само почеток. Од тој момент натаму ќе треба да бидете достапни за клиентот кога ќе има потреба од вашата услуга. Покажете посветеност и професионалност и по завршување на купопродажниот процес. Не заборавајте на моќта на препораките. Таа е пресудна во овој бизнис.“