Промоција за првата преработка од Викторија Чочороска на песната „Јаворе“

Детали

четврток, 06 јуни 2019

Синоќа во Домот на културата во Вевчани, пред драги пријатели, колеги и обожаватели на Викторија Чочороска се одржа промоцијата на нејзината прва преработка на една од најубавите стари македонски песни „Јаворе.“

Аранжманот за песната го направи композиторот Николче Мицевски, а снимена е во студиото ХЛ Момироски во Скопје. Покрај аудио верзијата, публиката уживаше и во промоцијата на видео спотот за песната во изработка на Дарио Јанковиќ и General film production.

Композиторот Мицевски не ги криеше чуствата и радоста од соработката со овој млад изведувач и синоќа во своето обраќање меѓу другото рече: „Чест ми е што сум вечерва во Вевчани и што имам прилика да промовирам песна која со особено задоволство ја сработив за Викторија. Уште првпат кога ја слушнав Вики како ја пее песната Јаворе, од срце поскав таа прекрасна македонска песна да блесне во нов сјај и исклучиво во нејзина изведба и мислам дека заедно успеавме во тоа.“

Викторија Чочороска  е млад изведувач, дипломирала на музичката академија во Скопје, а работи како професор по соло пеење во средното музичко училиште во Струга. Таа како соло изведувач патот во музичките води го започнува како член на КУД "Дримкол" од Вевчани, каде што и денес е активен член во пејачката група Каданка со која неодамна објавија и музичко ЦД на стари традиционални песни, а музиката со силен ентузијазам им ја наметнува и на многу млади дечиња преку креативни музички работилници.

Од нејзините досегашни ангажмани се издвојуваат соло настапите и концертите во рамки на Вевчанско културно лето, ликовната колонија „Вевчански видувања“ соло изведби за театарски претстави, а успешна соработка неодамна оствари и со групата Некст Тајм за песната „Нешто ќе те питам бабо“ за која песна го пее женскиот вокал, а соработува и концертира со дуото Даутовски.