„Ќе стиснам заби, пејам, они плачат“ - Коки со емотивна објава по повод 7 години од смртта на Дуле

Детали

петок, 25 септември 2020

Незаборавното дуо „Дуле и Коки“ ни подари музички дела кои не се забораваат, а и по 7 години од смртта на Дуле неговиот другар и колега Коки не може да се помири со загубата.

Две децении Дуле и Коки беа дуо кое нѐ честеше со прекрасни композиции и беа познати по своите одлични свирки низ различни локали во Македонија.

Но, за жал Душан Љубисављевиќ - Дуле, пејачот од познатото дуо почина на 23 септември 2013.

Неговиот колега Никола Јанков- Коки не го заборава и по повод 7-годишнината од неговата смрт објави емотивен статус на Фејсбук:

„Се враќам од свирка, од Струмица брат, па ми се сврте у главата, и викам да ти напишам уште едно писмо.. ама ова ќе биде последно, не те замарам повеќе, да не речеш абе Кочо седум години ми досаѓаш, дај олабави.

Брат, не знам дали да се смеам дали да плачам. Знаеш, сѐ ми доаѓа дека од негде ќе се појавиш и тоа најчесто коа свирам ми се случува, абе „фатаморгана“. Можеби па, сеа дури сфаќам дека стварно те нема, а..?

Сите прашуваат за тебе, не те заборавиле да знаеш, особено при крај на свирката.. ја темпирам „Колку треба да се плати“ ќе стиснам заби, им ја пеам, и они пеат, ама на таа не плачам, тешко ми е да плачам на таа, глеам они плачат…

На овој ден коа ја летна, знаеш на кој му е роденден? На Ице, замисли.. не сум ти кажал тоа. Кај одам јас без гитара, свириме заедно, и Сале е со нас. Ти стално, коа ќе спомнев Господ, сѐ викаше, ај батали тоа. Ама гледаш дека имало Господ, па ти ако не знаеш, кој? И кажи сеа дека ГОРЕ СИ Е ГОРЕ, нели.. добро е таму.

Овде е зезнато малку, мош малку повеќе. Има некој вирус, и ако го закачиш јако, за скоро умираш, ама некој ќе го фатат и ништо не им е.. поима неам… ваљда си чул.

Макфест прв пат оваа година на плоштадот се одржа, на отворено, не у домот на културата, заради тој вирусот, 35 години јубилеј..

Таму пак нѐ заборавија и двајцата, али нема везе.

Со Марија, сестра ти, ќе се сретнеме понекогаш. Нејзините две и од брат ти три, пет внучиња имаш. Не им ги памтам имињата, едното од брат ти се вика Душан Љубисављевиќ, знам, по тебе.

Да знаеш дека не престанувам со музиката, а ми има дојдено многу пати да баталам, ама има песни бе брат што треба да се пеат и да се свират. Помладите поима немаат кои биле Дуле и Коки ама песните ги знаат, глеаш.

Не знам шо сакав друго да ти кажам.. Знаеш што.. нема да биде ова последно писмо, ќе ти пишам пак, за некое време..

7

23.09.2020“

С. С. | Црнобело