Мобилниот интернет на А1 Македонија е најбрз и во Гостивар и во Крива Паланка

Детали

среда, 18 ноември 2020

Продолжува мерењето на квалитет на мрежите што го спроведува Агенцијата за електронски комуникации (АЕК). По Скопје, Куманово, Тетово и општина Илинден, мобилниот интернет на А1 Македонија е најбрз и во Гостивар и во Крива Паланка, покажува мерењето што вчера го соопшти агенцијата.

Последните извештаи покажуваат дека во Гостивар за симнување фајл со големина од 10GB, операторот А1 Македонија ДООЕЛ обезбедува брзина на податоци од 107.347 Mbps, наспроти Македонски Телеком АД Скопје каде брзината е 75.684 Mbps.

А1 обезбедува побрз интернет и во Крива Паланка, каде за преземање фајл со иста големина, брзината е 94.136 Mbps, а на Македонски Телеком 45.581 Mbps.

Мерењето на квалитетот на безжичните електронски комуникациски мрежи се извршува со користење софистицирана опрема инсталирана во специјално мерно возило за симулација на корисничко искуство, односно со комбинација од хардверско/софтверско решение за генерирање, анализа и објавување на податоците. Контролата ја спроведува АЕК која ги мери параметрите за квалитет на јавните електронски комуникациски услуги, а оваа активност произлегува од Правилникот за параметрите за квалитет на јавните електронски комуникациски услуги обезбедени преку јавни радиокомуникациски мрежи.

Извештајот за состојбата на квалитетот на јавни електронски комуникациски услуги обезбедени преку јавни електронски комуникациски мрежи за населено место Скопје се базира на мерењата на Агенцијата за електронски комуникации.

Извештаите од извршените мерења на АЕК се објавени на официјалната страница.