Мајка oд Македонија се враќа од Украина сама со автомобил со ќеркичката: „Сè е блокирано, имам 10 часа возење до граница“
- Детали
- четврток, 24 февруари 2022
„Да се надеваме дека мене како странец ќе ме пуштат на граница и дека на мојата ќерка Марта ќе ѝ дадат исто така дозвола да премине. Сопругот останува тука. Добри сме. Тука сите се истревожени. Никој не очекуваше. Толку мирен народ и сето ова им се случува, јас сум во шок. Првпат во живот да почувствувам такви емоции... Имаме уште 10 часа возење до граница“, вели Мери Амбросова.
фото (десно): Инстаграм
Мери Амбросова е Македонка на која веќе неколку години дом ѝ е Украина, поради сопругот Украинец.
Во интервју за CRNOBELO.com во 2020-та година Мери изјави: „Во Украина дојдов во ноември 2017-та, сопругот е Украинец, па затоа и живееме тука. Уште кога решив дека тој ќе биде мој партнер јасно беше дека ќе треба да се преселам. Кога се венчавме, одлуката беше донесена, иако никогаш не сум сакала да живеам во странство некако лесно се одлучив.
Патувавме со автомобил Скопје – Киев и можев да си земам повеќе работи од дома. Си го земав кучето од Скопје, неколку сувенири кои ми значеа, книги… Облека скоро сѐ оставив во Скопје само тоа што знаев дека ќе го носам или облека која ми значи.“
Сега таа сама со автомобил и со својата ќерка Марта се обидува да излезе од Украина и да дојде кон Македонија.
На Инстаграм Стори во видео обраќање вели:
„Јас патувам моментално и се вклучив со обраќање во живо на Инстаграм за да изгубам време затоа што Украина е огромна и само да ја превозиме треба 10 часа и знаете дека затворени се и границите.
Да се надеваме дека мене како странец ќе ме пуштат и дека на мојата ќерка Марта ќе ѝ дадат исто така дозвола да премине. Сопругот останува тука. Добри сме. Тука сите се истревожени.
Никој не очекуваше. Толку мирен народ и сето ова им се случува, јас сум во шок. Првпат во живот да почувствувам такви емоции.
Сите руски блогери изигруваат дека сè е во ред, никој не се побуни против ова што се прави. Буквално сите курсеви што се руски се поддржани од Украинци и никогаш немало ништо против Русите и ова е трагично што му се прави на овој народ.
До последно они беа за мир и сè да се реши по мирен пат, но ете тоа е. Благодарам на поддршката, не можам да ви вратам на сите во инбокс.
Киев беше блокиран, сега едвај излеговме на автопат, тука се невидени гужви.
Кај луѓето има паника дека нема да имаат ниту за храна, ниту за бензин. Имам уште 10 часа пат до граница, воопшто не ни знам дали ќе успеам да поминам дали не.
Мене ми се понуди помош за да излезам и тргнав кон Скопје. Благодарна сум за таа помош, инаку јас буквално немаше да знам што да правам...“
Таа додека патува редовно споделува информации на Инстаграм Стори, па така во една од објавите кажа дека таа и ќеркичката Марта се добро, а исто така рече дека патуваат за Македонија преку Романија.
Мери појасни дека сè уште се во Украина и дека кога ќе ја поминат границата нема да имаат интернет.
На Мери ѝ посакуваме безбедно патување.
Прочитајте и Мери Амбросова, скопјанка која љубовта ја одведе во Украина: „Секој викенд прават пикник, децата не јадат слатки и грицки до 3 години“
С. С. | Црнобело
Би можело да ве интересира:
Препорачуваме
Најчитани неделава
