Браво! Скопјанец тапацира клупи на автобуски постојки: „Во лето не можеш да седнеш од жешко, а во зима се лепиш на нив“

Детали

среда, 13 јули 2022

„Со оваа идеја се здобив пред некој ден кога сакав да седнам на таа клупа и веднаш рипнав како попарен, добро би служела летно време за јајце на око“ – вели скопјанецот кој самоиницијативно одлучил да направи клупите да бидат функционални на неколку градски постојки.

Секој што некогаш се обидел да седне на металните клупи на автобуските постојки што се постојано изложени на сонце на температури над 35 степени Целзиусови, знае дека следниот пат подобро е да стои додека чека.

Токму затоа еден креативен скопјанец решил самоиницијативно да постави надклупи и да им овозможи на своите сограѓани да може да седнат во текот на летните горештини без страв дека ќе се изгорат.

На Фејсбук групата Stari skopjani, скопјанецот Ангел Јаневски објави дека по лошото искуство на една од клупите на постојките низ градот, одлучил сам да направи добро дело за неговиот град.

„За мојот град, вчера направив две надклупи и не ме трпеше место, денес една поставив на автобуската постојка карши споменикот на Јане Сандански (42 и 13).

Со оваа идеја се здобив пред некој ден кога сакав да седнам на таа клупа и веднаш рипнав како попарен, добро би служела летно време за јајце на око, а во зима исто така е неупотреблива затоа што ќе се залепиш на челикот.

Се гледа дека е премачкана на корозивна површина и затоа е во ваква состојба по некоја година. А и не ме чинеше многу потребвниот материјал. Парче иверка од 16mm, мебел штоф мазен, сунѓер 20mm, муниција за тапетирање и неколку завртки за дрво за зацврстување“ – стои во објавата на Ангел кој вели дека не знае колку време ќе е во употреба оваа надклупа и вели дека очекува да добие пријава за ова.

Погледнете ги фотографиите што тој ги објави на Фејсбук:

Б. С. Б. | Црнобело