Англиски блогери по посетата на Македонија: „Дали на Балканот ќе гладувате ако сте веган?“
„Ако сте вегани и патувате низ Балканот, обидете се да најдете сместување на места каде имате можност сами да си готвите храна“ – препорачуваат двајцата блогери од Обединетото Кралство што во изминатиот период ги посетиле балканските земји, меѓу кои и Македонија.
Дан и Ем од Велика Британија себеси се опишуваат како дигитални номади. Тие постојано патуваат низ светот и ги испробуваат нивните омилени вегански рецепти, а неодамна го посетија Балканот.
Тие на својот Инстаграм профил објавија интересно видео кое го насловија:
„Дали е тешко да се биде веган додека патувате низ земјите од Балканот“.
Иако се смета дека е мошне тешко да се најде веганска храна во Балканските земји и дека луѓето со ваков начин на исхрана кога ќе ги посетат овие земји треба да гладуваат, блогерите Дан и Ем покажаа дека и на нашите простори може да се најде храна соодветна за нивните потреби.
Во описот до видеото тие појаснија како изгледало нивното патување низ Балканот во поглед на исхраната, со оглед на тоа што и двајцата се вегани:
„Дали е тешко да се биде веган додека патувате низ земјите од Балканот?
Краток одговор? Да, може да биде.
Долг одговор? Па и да и не. Ќе треба да направите детално истражување, не можете да влезете во кој било ресторан и да очекувате дека ќе добиете веганска храна.
Сепак бевме пријатно изненадени од тоа што секаде каде што поминавме (освен во Котор, Црна Гора) имаше вегански ресторани.
Ги посетивме Хрватска, Босна и Херцеговина, Црна Гора, Албанија и Македонија и во сите земји бевме во поголемите градови, така што немаме големо искуство, но веруваме дека ако ги посетите помалите места, тогаш ќе имате проблеми.
Наш совет кога патувате низ Балканот е да најдете сместување каде ќе имате можност самите да готвите. Во поголемиот дел од градовите имаше вегетаријански кафулиња со повеќе опции за храна, а кога немаше таква опција тогаш ќе мора да одите во повеќе ресторани каде се служи месо и да се задоволите со салати и помфрит“ – пишуваат тие.
Сепак од видеото може да се види дека не останале гладни, па имале повеќе опции за храна.
На Инстаграм Стори пак, споделуваат дека во сите маркети редовно може да се најдат лубеници:
„Ако го посетите Балканот бидете подготвени да видите многу лубеници. Овие луѓе многу ги сакаат лубениците“ – стои во напис на фотографијата.
Б. С. Б. | Црнобело
Би можело да ве интересира:
Препорачуваме
Најчитани неделава
