Александра Шијакоска го прослави 30-тиот роденден - блесна во бел фустан и со ангелски крилја (фото)

Детали

среда, 08 март 2023

Една година по тешките настани во нејзиниот живот, Александра Шијакоска е посреќна од кога било. Слави роденден со најблиските облечена во бело, откако на вистинскиот ден прослави со колешките и пријателки на инфлуенсерското патување во Маурициус.

Инфлуенсерката Александра Шијакоска го прослави својот 30-ти роденден на Маурициус, но сега и со најблиските славеше и во Македонија, по враќањето од патувањето. 

Таа се забавуваше цел ден и објавуваше слики и видеа на социјалните мрежи од тоа како ѝ поминува денот, од шминка кај Зоран Шурбевски до фризурата што ѝ ја направи Октај Сејди, па потоа како се подготвува за фотосесија со фотографот и пријател Антонио Станков.

Александра на Инстаграм Стори објави неколку кратки видеа и слики од целодневната забава. Облечена во бел фустан, таа позираше со роденденската торта пред ѕид со големи бели ангелски крилја. Амбиентот го надополнија бели и сребрени балони.

Инаку роденденот на Шијакоска беше минатиот викенд и таа го прослави на Маурициус, заедно со Лила Филиповска, Тамара Тодевска, Биг Мама, Алмедина Исмајли и Аида Хусеин Бакији. 

Оттаму објави и неколку слики и емотивна порака, која гласеше:

„Дел од моето срце, душа и мисли:

Пред точно една година мислев дека го славам мојот последен роденден. Си собрав неколку од пријателите и семејството и сакав да имаме еден заеднички спомен по кој ќе ме памтат. Сакав да ме памтат каква што отсекогаш сум била. Насмеана, среќна и полна со живот и љубов.

Не сакав да ме памтат како Александра која се плаши од смртта. И навистина не се плашев, во ниеден момент. Длабоко во себе знаев дека мојата приказна не завршува тука и на ваков начин. Господ не ги остава своите деца сами и незаштитени.

Година подоцна го славам мојот 30-ти роденден на остров во Африка.

Прв пат славам роденден без семејството и пријателите и малку ми недостигаат, но сега имам два родендени па вториот ќе го прославиме заедно со нив. На 10-ти полнам една година од мојот нов живот.

А вие драги мои пријатели да сте здрави, живи и весели. Да имаме здравје, среќа и љубов, само тоа не се купува со пари, за се друго напорно ќе работиме за да си го оствариме.

Планирав голема забава за 30-ката ама и вака не е лошо. Ич не се бунам“, напиша таа.

Фотографии од нејзината прослава во Македонија:

Прочитајте и Александра Шијакоска со емотивна објава од Маурициус: „Пред точно 1 година мислев дека го славам последниот роденден“

  А. Ј. | Црнобело