„Страв ми беше да држам змија, но кога се смирив - таа почна да позира“: Ивона Јо за снимањето на спотот за песната „Друго“

„Имаше еден момент кога сите си заминаа некаде од сетот, а јас и змијата Жане останавме сами. Тогаш сфатив дека како што се смири моето срцебиење, така се смири и таа. Змијата го следеше мојот страв“ - вели Ивона за CRNOBELO.com.

Пејачката Ивона Јо пред точно една година го објави спотот за нејзината песна „Друго“, па се потсети на моментите од снимањето на видеото.

А таму, освен дружењето со екипата, Ивона се дружеше и со змијата Жане, која на сетот ја донесе Војо Иванов.

За CRNOBELO.com, една година по снимањето, Ивона раскажа какво искуство било да држи змија во рацете и колкав страв имала од средбата со Жане:

„Ги сакам животните и не ги делам, иако постојат животни кои ми предизвикуваат голем страв.

Мора да признаам дека имав страв од змијата, тоа ми беше прво соочување со овој влекач во животот, но, благодарение на Војо, многу брзо се прилагодив на неа.

Кога завршивме со неа, до крајот на снимањето многу ми фалеше нејзиното присуство, бидејќи сцените со неа ги снимавме повеќе од 2 часа.

Во тоа време Жане беше цело време до мене, во моите раце и мислам дека се прилагоди и таа на мене.

Имаше еден момент кога сите си заминаа некаде од сетот, а јас и Жане останавме сами.

Тогаш сфатив дека како што се смири моето срцебиење, така се смири и таа. Змијата го следеше мојот страв.

Додека јас бев испаничена, таа мрдаше, а кога јас се смирив и ја прифатив и таа се смири, па почна да позира.

Од денешен аспект, мора да кажам дека сум пресреќна и ќе згрешев ако не го послушав режисерот Мартин Трајановски да снимаме сцени со змијата.

Ова ми помогна и да се спротивставам и да надминам еден мој страв што го имав“.

Пејачката на својот Инстаграм сподели видео направено од зад сцената и некои интересни моменти од дружењето со целата екипа.

„Денес ‘Друго’ го слави својот прв роденден. Вели: ‘Друго не ми треба друго, само љубов’. Не само денес, секој ден ни треба љубов. Нека патува безгрижно до вашите срца.

Ова видео е мал подарок од целата екипа што работеше вредно на овој проект. Дечки ве сакам, вез вас ‘Друго’ немаше да постои“ - напиша таа.

Погледнете го видеото:

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело