Пајак конечно со прв студиски албум: „2000 и некоја“ носи дуети со Тајзи, Јован и Елвир, Тони Зен и Лара

По години тивко градење на својот звук и публика, со многу работа зад сцената и постепено освојување на просторот, Христијан Настески - Пајак го објави својот прв студиски албум „2000 и некоја“. Проект што долго се најавуваше и уште подолго се очекуваше.

Зад албумот стои Urban Records, предводен од Иван Јованов - Iwayo и Гордан Божиновски, чии улоги се клучни во обликувањето на целиот проект. Токму оваа соработка му дава на „2000 и некоја“ продукциска цврстина, но и простор Пајак да остане свој.

Во креативниот процес се вклучени и Лазар Цветковски, Луна, Таско, Тајзи и Елвир Мекиќ, како дел од поширокиот авторско-продукциски тим, чиј придонес се чувствува во звукот и дел од текстовите, без да се наруши неговиот препознатлив израз.

Албумот носи природна динамика, од енергични, модерни песни до поинтимни и повлечени моменти. Траките „Токсична“, „Допамин“, „Тајни“, „Ризик“, „Тотално луда“ и „Биди ми добра“ ја покажуваат таа ширина, без да звучат како одделни приказни, туку како дел од ист процес.

Дуетите се еден од најживите сегменти на албумот. Соработките со Тајзи, Тони Зен, Лара, како и „Делириум“ со Јован Јованов и Елвир Мекиќ, носат различна енергија, но без да го оттурнат од неговиот стил. 

Паралелно со студиската работа, Lollipop Entertainment Group стои зад неговите настапи, градејќи ја врската со публиката и надвор од дигиталниот простор, таму каде што песните добиваат поинаква тежина. 

Визуелниот идентитет на албумот и придружните приказни се реализирани со посебно внимание, зад кои стојат Верица Божиновска и Steady Flow, додавајќи уште еден слој на препознатливост и естетика на целиот проект.

И покрај целиот тим зад него, „2000 и некоја“ останува личен албум. Во него се чувствува патот што го има поминато, не само како артист, туку и како некој што постепено го наоѓал својот глас.

„Овој албум за мене има тежина што не можам лесно да ја објаснам. Не е само музика, туку период од мојот живот во кој се случуваа многу работи, и убави и тешки. Сè што поминував, на некој начин завршуваше во студио. Затоа ова ми е прв проект каде што чувствувам дека сум целосно искрен. И затоа оваа промоција ја доживувам многу емотивно, како нешто што долго сум го носел во себе“, вели Пајак.

Со „2000 и некоја“, Пајак не само што ја крунисува досегашната работа, туку поставува појасна слика за тоа каде е во моментов на домашната сцена.