Емилија Мицевска со голо трудничко стомаче, Рубенс Муратовски пееше со синовите - Како си поминав на „Глумците пеат“ 2026?

Детали

среда, 25 март 2026

Тања Кочовска, непланирано од публика излезе да пее со актерите, а се прекачи „преку балкон“ за да стигне на сцената, младите актери беа задолжени за одличниот хумор во најавите, Наталија Теодосиева одлично се трансформираше во Ноне, а на сцената излезе и Гиш, но преку одличниот перформанс на младата Тина Трпкоска. Како си поминав на „Глумците пеат“ 2026?

Вчеравечер (24.03) во Македонскиот народен театар се случуваше експлозија од емоции, а причината беше 34-тото издание на манифестацијата „Глумците пеат“.

Повеќе од два часа заедно со сите гости уживав во најновото издание на манифестацијата што во 1992-ра ја создаде легендарниот актер Марин Бабиќ, а сега, неговиот аманет и повеќе од достојно го продолжуваат ќерките Маја и Ира.

Но вчера, „Глумците пеат“ за мене беше повеќе од доживување како гледач од публика - пред „да се крене завесата“ и да почне шоуто, со мојата колешка Моника, се дружевме со актерите зад сцената, се смеевме, гледавме како се подготвуваат за настапите, како со пластично шише со вода наместо микрофон ја вежбаат точката со која ќе се претстават пред публиката.

Но, тоа што го видов зад сцената не ме подготви за шоуто. Напротив, ми ги надмина очекувањата и си поминав одлично.

Се фатив себеси како на моменти се смеам на шегите кои не делуваа како да се кажани по сценарио, туку смислени природно, сега и тука, благодарение на Стефан Спасов (кого го најавија како синот на Дац и нешто во што Александар Митевски не вмешал прсти), Дениз Абдула и Григор Јовановски.

На моменти пеев на цел глас, особено кога ќе почнеше песна што сум ја сакала одамна, а сум ја заборавила (се сеќавате на „Цвето моме клето“ од Студени нозе?).

Станував, аплаудирав, како да сакав да им кажам на актерите дека се одлични, дури и на оние на кои пеењето не им е баш силна страна, но дадоа сè од себе на сцената, и кои се забавуваа додека играа, глумеа и пееја.

Иако сите имаат чиста десетка за тоа што го покажаа, сепак, мора да издвојам неколку настапи.

Рубенс Муратовски ја испеа „Наташа од трето три“, а на сцената му правеа друштво неговите два сина, кои и пееја, и свиреа на гитара, па ги собраа симпатиите на целата публика.

Слаѓана Вујошевиќ се трансформираше додека ја пееше песната „Емил врати се“ од „Бастион“ - едната половина од телото ѝ беше маскирана во маж, другата во жена и додека се вртеше лево и десно, пееше и глумеше два лика одеднаш, но тоа го направи маестрално.

Продолжува на следната страница...