Рајан Гослинг мета на критики, по изјавата дека е разочаран за номинацијата за Оскар: „Зошто тогаш не ја одбиеш?“

Детали

среда, 24 јануари 2024

„Многу помоќна ќе му беше изјавата ако ја одбиеше номинацијата“ – велат твитерџиите, откако на социјалните мрежи беше објавена изјавата на Рајан Гослинг, каде тој тврди дека се чувствува разочарано затоа што Марго Роби и Грета Гервиг не биле номинирани за Оскари. За разлика од нив, актерот доби номинација за улогата во Barbie.

По објавувањето на номинациите за Оскарите, се огласи актерот Рајан Гослинг, кој е номиниран за најдобар актер во споредна улога, за изведбата во филмот Barbie.

Но, наместо само благодарност и пофалби, актерот упати и критики до Академијата.

Според изјавата, Рајан е вознемирен што режисерката на филмот Грета Гервиг и неговата колешка Марго Роби не добиле номинации, затоа што тие се најзаслужни за успехот што го доживеа филмот.

„Не постои Кен без Барби и нема да постои филмот Barbie без Грета Гервиг и Марго Роби, кои впрочем се и најзаслужни за овој историски филм со светска слава.

Нема да има признанија за кој било во филмот, ако тие немаат талент, умешност и генијалност.

Повеќе сум од разочаран што тие не се номинирани во категориите за улогите што ги одиграа“ – нагласи Рајан Гослинг меѓу другото.

Daily Mail, повикувајќи се на извори блиски до актерот, пишува дека тој е пресреќен за номинацијата, но истовремено е и тажен и разочаран затоа што Марго и Грета не биле номинирани, а чувствува дека токму ним им го должи успехот што го постигнал.

Но, по изјавата, твитерџиите почнаа да коментираат дека актерот само искажува лажна солидарност кон своите колешки.

„Можеше да ја одбие номинацијата или да одбиеше да ја прифатиш додека Грета и Марго не бидат номинирани“;

„Многу помоќна ќе му беше изјавата ако ја одбиеше номинацијата“;

„Ако бев на негово место, ќе побарав да ја повлечат номинацијата и во знак на протест немаше да се појавам на доделувањето на наградите“ - стои во дел од коментарите.

Прочитајте и Номинации за Оскари 2024: „Oppenheimer“ доминира, Марго Роби не е номинирана

 Б. С. Б. | Црнобело