Хари беше претставен како зависник и нацист, а Вилијам беше златниот принц – Што ѝ претходеше на кавгата на браќата?

Детали

среда, 27 март 2024

Иако многумина ја обвинуваат Меган Маркл за раздорот меѓу Вилијам и Хари, вистината е дека нивните односи биле влошени многу години пред тоа. По скандалите со марихуана и нацистичките амблеми, Хари загубил доверба во брат му, кој наводно бил „мозокот“ зад сите скандали.

По објавата за здравствените проблеми на Кејт Мидлтон и кралот Чарлс, многумина очекуваа дека може да дојде до помирување на двајцата браќа во кралското семејство, Вилијам и Хари, но според познатите кралски биографи тоа нема шанси да се случи. Зошто?

Според кралскиот биограф Роберт Лејси, односите меѓу двата принца почнале да се влошуваат уште во 2002-ра година, кога Хари имал само 17 години, a Вилијам 19.

Во тој период Хари беше топ тема во сите светски таблоиди заради неговата желба да консумира канабис.

Речиси секаде беше објавена фотката на која Хари е на рагби натпревар заедно со неговиот другар Гај Пели, момчето што наводно го навело принцот да консумира опојни супстанци.

Во истиот период во медиумите се појавија и пишувања дека Хари бил вклучен во полициска истрага откако бил фатен како пие алкохол во паб, по завршувањето на работното време.

Наводно тој и двајца повозрасни момчиња играле билјард во пабот и биле замолени да го напуштат објектот кога станало доцна, но Хари не прифатил.

Во истиот период имаше пишувања и дека Хари ќе биде пратен на рехабилитација од страна на татко му, а дека тој почнал да консумира алкохол уште на 11 години, кога родителите го оставиле сам со пријатели на јахта на грчките острови.

Хари раскажува за овој период од неговиот живот во својата биографија The Spare и вели дека тие насловни страници биле дело на познат публицист, кој сакал да го смени имиџот на принцот Чарлс и од неверен сопруг да го претвори во загрижен и очаен татко, кој сам се грижи за сопствените синови.

Според кралскиот биограф Роберт Лејси, во овој период помладиот принц сфатил дека треба да биде жртвено јагне за брат му и воопшто не му се допаѓала таа улога.

„Хари се чувствуваше отфрлено. Пријателите се сеќаваат дека браќата не зборувале и биле во лоши односи, а за време на скандалот со дрога, Хари сфати дека неговата улога е да игра жртвено јагне.

Во пабот, кога Хари бил уапсен, тој и неговиот другар Гај Пели ја преземаа целата вина, но вистината е дека водич на дружината бил Вилијам.

„Функцијата на постариот брат беше да биде совршен, без разлика дали е таков или не, а функцијата на помладиот брат беше да ги засмева другите, да нѐ натера да го осудуваме или да не го одобруваме неговото однесување – и сите тие настани нѐ натераа да се чувствуваме супериорни над кутрото дете“ – пишува авторот.

Сличен инцидент се случи и во 2005-та година кога Хари се појави на забава маскиран во костим со нацистички обележја. По ова принцот мораше да се извини јавно, а гласините беа дека татко му го натерал да оди во посета на логорот Аушвиц.

Во својата книга The Spare, Хари пак, тврди дека идејата за костимот не била негова, туку дека била на Вилијам и на Кејт.

Како и да е, Хари беше тој што се најде на насловните страници на сите таблоиди и повторно беше „црната овца“ во семејството, додека Вилијам остана без дамка, а јасно е дека денешниот раздор е само плод на долгогодишно несогласување.

Б. С. Б. | Црнобело