Познатите близначки Кеслер починаа на ист ден, со асистирано самоубиство – Настапуваа со Френк Синатра, го одбиле Елвис Присли

Детали

вторник, 18 ноември 2025

Танчарките и пејачки Алис и Елен Кеслер починаа вчера (17.11), на 89-годишна возраст со асистирано самоубиство. Близначките беа огромни ѕвезди во 1950-тите, настапуваа со некои од најпознатите музичари и редовно гостуваа во популарни емисии, пред да се пензионираат во родната Германија.

Легендарните близначки Кеслер, кои беа познати танчарки и пејачки во САД и Европа во 1950-тите, починаа на 89-годишна возраст со асистирано самоубиство.

Како што пренесуваат германските медиуми, тие починале вчера (17.11) во нивниот дом во близина на Минхен.

На врвот на кариерата, Алис и Елен Кеслер се појавува во многу емисии, а настапува со некои од најголемите музички ѕвезди, вклучувајќи го и Френк Синатра.

Според изворите, сега се одлучиле на драстичен чекор бидејќи повеќе не сакале да живеат и сакале заедно до го напуштат овој свет.

Во Германија асистираното самоубиство беше забрането во 2015 година, но во 2020-та, забраната беше тргната. Сепак, оние кои сакаат медицинска помош за да стават крај на својот живот, мораат сами да ја донесат одлуката.

Уште минатата година близначките зборуваа за нивната смрт и споделија дека би сакале да бидат кремирани, а нивната пепел да биде ставена во иста урна, заедно со останките од мајка им и нивното куче.

Родени во Германија, Алис и Елен Кеслер ја почнале кариерата уште во детството кога играле балет.

Во 1952-ра, кога имале само 16 години, близначките почнале да настапуваат низ Европа.

Брзо се прославиле и почнале да го привлекуваат вниманието и на американски изведувачи, па во својата кариера имаат настапувано со низа огромни ѕвезди.

Според гласините, Елвис Присли бил нивен огромен фан, па дури и ги молел да соработуваат, но тие го одбиле.

Кон крајот на 1950-тите, близначките се фокусираа на пеење, а во раните 1960-ти почнаа да се појавуваат и во познати американски емисии, што дополнително им ја зголеми популарноста.

Во 1986 година, Алис и Елен се вратиле во Германија, каде заедно ги поминаа останатите 40 години од нивните животи.

Спирова С. | Црнобело