Водителот Џереми Кларксон откри дека има рак: „Агресивен е, дел од третманот помина лошо“

Сезоната се снимаше во периодов 2024-2025, што значи дека Џереми ја дознал дијагнозата во мај минатата година.

Потоа тој додава дека ќе треба да оди на третман кон крајот на јули, односно во периодот кога ќе биде бербата.

Пред емитувањето на емотивните епизоди, на Инстаграм објава Џереми даде предупредување дека ќе бидат тешки за гледање.

„Обично сакаме шоуто да биде забавно, но последните две епизоди кои ќе излезат вечерва, не се ништо од тоа.

Искрено, тешки се за гледање“, вели водителот во видеото.

Во шоуто, Џереми открива и нешто повеќе за моментот кога ја добил дијагнозата:

„Бев на преглед, се сеќавате, во мај. Исчезнав и ми направија биопсија и имам рак, агресивен е. Но, уште е рано, па третманот ќе биде, знаете…

Се молев дека ќе можеме да завршиме со бербата, па потоа да одам на лекување, но третманот ќе биде токму тогаш“.

Џереми споделува дека ќе треба да му направат операција и дека ќе биде на боледување подолг период.

Подоцна во епизодата, Џереми разговара и со неговата девојка и ѝ вели:

„Па, ја почнавме годината и имав коронарна артериска болест, а ја завршивме со рак.

Можеме да размислуваме колку што сакаме за сите лоши работи што се случија на фармата, но мислам дека е подобро сега, на крајот на годината, да се фокусираме на добрите работи што се случија“.

Во шоуто е прикажан и дел од третманот на водителот – тој е во болнички кревет, а открива и дека некои работи не оделе по план.

„Некои од третманите тргнаа на лошо, може да се каже. Ќе бидам овде подолг период. Не знам што ќе се случи.

Само сакам да кажам дека ако сето ова е успешно, се гледаме во шестата сезона (од шоуто), ако не е, не се гледаме. Бидете добри“.

Снимањето на шестата сезона засега е одложено, а Џереми уште се бори со ракот.

Освен она што го открива во шоуто, нема споделено ништо друго за болеста, но во коментари на последната Инстаграм објава добива поддршка од многуте фанови.

Спирова С. | Црнобело