Тинејџерската ѕвезда Аманда Бајнс шетала гола низ Лос Анџелес – присилно е задржана во ментална установа

Детали

вторник, 21 март 2023

Аманда Бајнс, најпозната по тинејџерските филмови од 2000-тите, била пронајдена гола на улица во Лос Анџелес, по што била однесена во ментална установа. Наводно, актерката која има проблеми со менталното здравје, престанала да ги пие нејзините лекови пред инцидентот.

Аманда Бајнс, актерката која беше најголема тинејџерска ѕвезда во 2000-тите, е задржана во психијатриска установа откако била пронајдена гола на улица.

36-годишната актерка која со години има проблеми со зависности, но и со законот, во недела наутро била забележана низ улиците на Лос Анџелес, сама и без облека.

Според TMZ, актерката застанала возач на улицата и му рекла дека имала „психотична епизода“.

Актерката веднаш била однесена во полициска станица, а поради нејзината состојба, присилно е задржана во ментална установа.

Според изворите, актерката не е повредена и ќе биде под медицински надзор неколку денови.

Поради проблематичното однесување, но и проблемите со биполарното растројство и зависностите, мајката на Аманда имаше легално старателство над неа - исто како случајот со Бритни Спирс.

Мајка ѝ го доби старателството во 2013-та, кога Аманда беше присилно однесена во психијатриска установа поради испад во јавност.

Претходно таа беше апсена за бројни прекршоци, вклучувајќи возење во пијана состојба и фрлање предмети од нејзиниот стан во Менхетн.

Актерката беше ослободена од старателството во 2022 година и сè досега изгледаше дека состојбата ѝ се подобрува.

Неодамна требаше да оди и на дружба со поранешни колеги од телевизијата Nickelodeon, но откажа во последен момент поради „проблеми со здравјето“.

Изминативе две-три години актерката беше и верена, но се раздели од партнерот.

Разделбата беше бурна и Аманда го обвини вереникот дека не ги пиел лековите за неговите психички проблеми, почнал да користи наркотици и постојано гледал порнографски филмови.

Вереникот, пак, по инцидентот во неделата, сподели дека Аманда е таа која престанала да ги пие лековите:

„Престана да ги пие лековите и уште не ги пие. Таа е дива“.

Аманда стана светски позната уште пред да наполни 18 години. Во раните 2000-ти ја имаше главната улога во некои од најпопуларните тинејџерски филмови, вклучувајќи ги Hairspray, She’s the Man и Easy A.

Но, во периодот кога го достигна врвот, Аманда почна да се повлекува од филмската сцена и се впушти во нејзините бројни проблеми.

Прочитајте повеќе: „Лажирав симптоми за да ми дадат седативи, бев зависна“ – Трагичната приказна на тинејџерската ѕвезда Аманда Бајнс

Спирова С. | Црнобело