Тренерот Луис Енрике емотивен за ќерката што почина од рак (9) - Пред 6 години славеа заедно, сега ѝ ја посвети титулата на ПСЖ

Детали

понеделник, 02 јуни 2025

Кога во 2019 година, поранешниот шпански фудбалер Луис Енрике, ја загуби ќерка си Хана по само 5-месечна битка со рак на коските, тоа остави огромна празнина во неговото срце. Но, пред само неколку дена, кога како тренер на ПСЖ ја освои Лигата на шампионите, тој победата ѝ ја посвети токму неа.

Шампионската европска титула, која ПСЖ ја освои минатиот викенд, предизвика бура емоции меѓу француските навивачи.

На стадионот во Минхен, ПСЖ со 5:0 го победи италијански Интер и се запиша на листата најдобри европски клубови.

Фудбалерите се радуваа, навивачите беа во делириум, а тренерот Луис Енрике, во солзи.

Тој шампионската титула ја посвети на својата почината ќерка, која имаше само 9 години, а почина по кратка борба со инванзивен вид рак на коските.

Луис Енрике ја соблече својата кошула и на теренот остана по маичка на која беа нацртани две карикатури - тој и ќерка му Хана со знамето на ФК Барселона во рацете, кои се радуваат на победата на Барса против Јувентус во Лигата на шампиони во 2015 година.

Оваа слика, од малата Хана која носи дрес со бројот 8, бројот на нејзиниот славен татко и го вее знамето, остана врежана длабоко во сеќавањата на сите фудбалски фанови.

Во нејзина чест и фановите на ПСЖ пред натпреварот во Минхен, на трибините раширија огромно знаме со истата слика - таа во дрес со бројот 8, знамето и Луис Енрике.

„Имам една прекрасна фотографија од неа, како го забодува знамето на Барса во фудбалскиот терен. Ќерка ми овој пат нема да е покрај мене физички, но ќе биде присутна со духот“ - рекол Енрике пред финалниот натпревар.

Луис Енрике секогаш со многу емоции зборува за ќерка си, па вели дека поминале прекрасни 9 години со неа:

„Дали се сметам за среќен или несреќен? Мислам дека сум среќен.Ми велат дека ќерка ми почина на само 9 години. Да, но таа дојде на овој свет и беше покрај нас 9 прекрасни години, а ние имаме прекрасни спомени, видеа, фотографии од неа.

Мајка ми не чуваше дома фотографии од Хана, додека не ја прашав зошто нема ниедна, а таа ми рече дека не може. Ѝ одговорив дека мора да стави фотки низ домот, зашто, иако не е меѓу нас физички, секогаш ќе биде присутна со духот“.

Погледнете го видеото:

А. Ј. | Црнобело