Историја за македонскиот фудбал - F7 репрезентацијата ќе учествува на престижен турнир во Италија, Горан Пандев предводник на тимот

Детали

петок, 28 ноември 2025

На официјална покана од претседателот на FIF7 Европа, Calcio 7 и Calcio 8 Italia – г. Фабрицио Лофреда, Македонија F7 за прв пат во својата историја ќе учествува на меѓународен турнир – престижниот Confederation Cup Rome, кој ќе се одржи во Рим на 13 и 14 декември.

Нашиот национален тим ќе биде составен од многу поранешни македонски репрезентативци – играчи со огромно искуство, квалитет и силен натпреварувачки дух.

Дополнителна чест и мотивација е фактот што селекцијата ќе ја предводи легендарниот Горан Пандев, еден од најголемите спортски симболи на македонскиот фудбал.

Фудбал 7 претставува еден од најбрзорастечките спортови во светот – динамичен, интензивен и исполнет со возбудливи моменти. Комбинацијата од техничка игра, брзи транзиции и постојана акција го прави овој формат идеален и за играчи и за гледачи.

Со помал простор, повеќе дуели и почести ситуации за гол, F7 создава игра што е полна со енергија и адреналин. Токму затоа овој спорт привлекува сè повеќе учесници, клубови и обожаватели ширум светот.

Фудбал 7 не е само игра – тој е ново фудбалско доживување што нуди брз ритам, спектакуларни потези и вистинска спортска страст. Формат кој расте, се развива и ја освојува Европа и светот со својата модерност и атрактивност.

Македонија F7 ќе има исклучителна чест да го отвори турнирот со Италија – вицешампион на последното Светско првенство во Фудбал 7, кое оваа година се одигра во Бразил, Куритиба.

За Италија ќе настапат и неколку поранешни професионални фудбалери, меѓу кои Гаетано Д’Агостино, Алесио Черчи, Давиде Москардели, Леонардо Бонучи и Антонио Ди Нателе, што го прави овој дуел уште поважен и поатрактивен – вистински спектакл уште од првата минута.

Учеството во Рим е огромен исчекор за развојот на Фудбал 7 во Македонија.

Правиме историја. Одиме во Рим!