Мајката на Новак Ѓоковиќ ја откри неговата тајна: „Не сакаше ниту да се оперира“

Детали

среда, 11 мај 2022

„Новак не сака лекови, не сака да внесува сѐ и сешто во својот организам, се каеше откако отиде на операција на раката“ – откри мајката на најпознатиот тенисер, Дијана. Таа говореше за тоа какви ставови има тој за современата медицина.

Мајката на Новак Ѓоковиќ, Дијана гостуваше во емисијата „Dok anđeli spavaju“, каде раскажа повеќе детали од сопствениот живот, но откри и повеќе тајни за животот на нејзиниот познат син.

Од детали за своите внуци и деца, до интересни анегдоти од животот со нејзините синови, Дијана најмногу внимание во емисијата му посвети на Новак, а нагласи дека подеднакво е горда на сите членови во нејзиното семејство.

„Јас сум пред сѐ мајка, многу сум горда на тоа што Новак го постигна, но јас сум мајка на три сина. Секогаш ќе го нагласувам тоа и не можам да ги делам Новак од Марко и Џоле и за мене моите три деца се мои три бисери и на сите сум подеднакво горда“ – рече таа.

Во јануари годинава Новак беше депортиран од Австралија каде требаше да присуствува на Australian Open, откако не достави документи за вакцинација против ковид.

Дијана во емисијата говореше за неговата длабока посветеност на религијата и верата, а во еден миг ја откри и неговата тајна за тоа какви се неговите ставови во поглед на современата медицина.

„Новак постојано е во потрага по некои нови сознанија. Нешто што нам обичните смртници не ни е достапно и не ни е блиско. Исхрана, терапии, алтернативни методи, тоа е она што него го интересира.

Не е поборник за класичната медицина, што веќе е општо познато, но имаше една епизода кога мораше да се оперира“ - вели Дијана и се осврна на повредата на раката заради која Новак во 2017-та година мораше да направи пауза заради повредата на лактот.

Како што појасни, најпознатиот светски тенисер едноставно не сака никакви лекови и секогаш прво се обидува да најде алтернативно решение за здравствените проблеми.

„Кога се разбуди од анестезијата, ми рече дека се издал самиот себеси. Јас му објаснив дека го направил тоа што морал да го направи ако сака да продолжи да игра и дека тоа беше неопходно. Се обиде со алтернативни методи, со сѐ што му беше достапно, но ништо не даде резултати.

Новак едноставно се противи на тоа, не сака лекови, не сака да внесува сѐ и сешто во својот организам. Љубопитен е, чита сѐ што ќе најде, се образува...

Ете, и таа исхрана, не знам дали мене или на некој друг би му се допаднала, но нему му одговара. И не можам ништо да кажам, затоа што ми ја затвори устата со своите резултати. Ние веруваме дека месото е единствен  извор на протеини, а тој ни докажа дека тоа не е така“ – вели Дијана.

Целосното гостување на Дијана во емисијата во која говореше и братот на Новак, Џоле, можете да го погледнете во продолжение:

https://www.youtube.com/watch?v=x58-AlQwAD8

Б. С. Б. | Црнобело