Пријателки тргнале на пат околу светот за 80 дена по повод 80-тиот роденден - ги посетиле сите континенти (фото)

Детали

петок, 31 март 2023

Кога им наближувал 80-тиот роденден, Сенди и Ели од Тексас решиле да одат на пат околу светот за 80 дена. Пандемијата ги натерала да ги одложат плановите, но годинава конечно тргнале на пат, ги посетиле сите седум континенти и наскоро треба да се вратат дома.

Инспирирани од книгата „Пат околу светот за 80 дена“ на Жил Верн, две жени на 81-годишна возраст решиле да го посетат секој континент на Земјата, за 80-тина дена.

Сенди Хазелип и Ели Хамби се запознале пред повеќе од 20 години, кога и двете биле на патување во Замбија.

Желбата за авантура ги зближила, па познанството прераснало во долгогодишно пријателство.

Кога им наближувал 80-тиот роденден, Сенди ѝ предложила на Ели да го пропатуваат светот за 80 дена, како во популарната книга.

Ели веднаш се согласила, но пријателките не успеале да го реализираат планот поради рестрикциите од пандемијата.

На 11-ти јануари 2023, конечно тргнале на пат. Почнале од Тексас, каде што живеат, и прво се упатиле кон Антарктикот.

Оттаму тргнале кон Велигденските Острови, а потоа сакале да одат во Перу. Но, поради политичката ситуација во државата, морале да направат промени во планот и се упатиле кон Аргентина.

Потоа го посетиле Мадрид, а отишле и во Финска за да ја видат поларната светлина.

„Ја видовме поларната светлина. Стоевме надвор на -20 степени, но вредеше“, откриваат Сенди и Ели во нивниот блог.

Оттаму отишле во Рим и Лондон, па се упатиле кон Африка.

Следно ја посетиле Индија, па Непал, а летале и над Монт Еверест.

Дотогаш, Ели и Сенди биле на 34 авионски летови, а истакнуваат дека никогаш не летаат со прва класа.

Двете пријателки отишле и во Јапонија, па во Бали, а моментално се наоѓаат во Австралија.

Нивното патување ќе заврши деновиве, а Енди и Сели велат дека се пресреќни не само за авантурата, туку и за тоа што инспирирале и други луѓе да тргнат на слично патување.

„Луѓе ни испраќаат мејлови, пораки, им се јавуваат на пријатели и им велат и тие да направат нешто вакво.

Еден 87-годишен маж ни испрати порака и ни кажа дека почнал да го планира неговото патување – пат околу светот за 90 дена на 90 години. Нормално, ние му рековме да оди“ - пишуваат Енди и Сели на нивниот блог.

Повеќе фотки од инспиративните пријателки на следната страница...