Трауматично искуство на жена од Ирска: „Ми откажа падобранот и преживеав пад од 1.980 метри“

Детали

сабота, 03 јуни 2023

„Физичките повреди заздравеа брзо, но речиси 25 години се борев со депресија и кошмари по несреќата“ – раскажува Џоан Меконвил, една од ретките која успеала да преживее пад од 1.980 метри, при скок со падобран.

Џоан Меконвил (51) од Ирска денес е мотивациски говорник која во 1995-та година имала блиска средба со смртта, кога скокала со падобран од авион и преживеала пад од 1.980 метри.

Џоан објави и книга во која раскажува што се случило тоа кобно утро на 1-ви април во 1995-та година, насловена My piece of Sky, а честопати го споделува и своето искуство со светските медиуми со цел да ги поддржи и другите луѓе кои биле на чекор до смртта и преживеале трауматични искуства.

Таа раскажува дека за првпат скокала со падобран во 1993-та година за да собере пари за добротворни цели и станала зависна од адреналинот, па во следните 22 месеци имала вкупно 63 скокови.

Благодарение на нејзиното ново хоби, Џоан го сретнала и нејзиниот сопруг Џо, кој бил инструктор за скокање со падобран и од 1994-та година почнале романтична врска.

Според неа, најголемата иронија во целата приказна е тоа што воопшто не требало ниту да скока со падобран тој ден.

„Како самохрана мајка која работи како медицинска сестра, скокањето со падобран во тој период ми нудеше толку многу возбуда и адреналин, како ништо друго на светот.

Тоа утро, пред да ми се случи несреќата завршував некои обврски, па се јавив во клубот и Џо ме молеше да дојдам, затоа што им недостасуваше уште еден човек за да се наполни авионот и да можат да тргнат“ – раскажува таа.

Првите падобранци скокнале на височина од 1.066 метри, втората група скокнала на височина од 1.820 метри, а Џоан и Џо се искачиле на висина од 1.980 метри, па скокнале.

Само 1 минута и 10 секунди подоцна Џоан паднала на земја со брзина од 160km на час.

„Од авионот ги гледав полињата и куќите што се гледаа како мали точки под нас. ‘Се гледаме долу’, му реков на дечко ми, пред да скокнеме.

Како да стоевме во времето и се смеевме. Одеднаш видов дека тој нешто ми покажува, но не го разбирав што сака да ми каже.

Потоа, тој го повлече падобранот и сфатив колку сме блиску до земјата. Брзо го повлеков и мојот падобран, но кога се отвори, во исто време се активира и резервниот падобран и двата се заплеткаа. Земјата стануваше сѐ поблиску, а јажето ми се заплетка околу вратот“ – вели таа.

Џоан раскажува дека во миговите додека паѓала пред себе ги видела сликите од сопствениот живот – го чувствувала мирисот на нејзините три сина како се туткаат до неа во постелата.

Вистинско чудо било што Џоан успеала да го преживее падот, а веднаш била пренесена во болница со голем број скршеници по целото тело, без заби, со оштетен црн дроб, и голема загуба на крв.

Таа успеала да закрепне по подолг престој во болница и потоа никогаш повеќе не се обидела да сконе со падобран, но вели дека иако физичките повреди заздравеле релативно брзо, таа долго време се справувала со менталните последици.

Цели 25 години по несреќата Џоан се борела со депресија и кошмари, но во 2020-тата година одлучила да напише книга во која ќе раскаже што навистина се случило.

„Присетувањето на настаните беше тешко, но ми помогна. Следната година по пишувањето на книгата, односно во 2021-ва, за првпат се вратив на местото на несреќата.

Речиси 25 години поминаа од несреќата и не знаев како ќе реагирам, но беше мирно и имав доволно време за да ја сфатам сериозноста на тоа што го преживеав. Бев благодарна“ – вели Џоан.

Таа денес работи како мотивациски говорник и јавно ја раскажува својата приказна за преживување, а вели дека конечно научила како да го живее секој ден како да ѝ е вистински подарок.

Б. С. Б. | Црнобело