Била предвреме родена, па останала слепа – Која е индонезиската пејачка која доби златен тастер од Сајмон Кауел? (видео)

Детали

четврток, 08 јуни 2023

Го загубила видот на 3 месеци, за првпат откриле дека има талент за пеење на возраст од 2 години, а на 8 години победила на Indonesia's Got Talent - која е Путри Ариани, слепата индонезиска натпреварувачка на America's Got Talent, која доби златен тастер од суровиот Сајмон Кауел?

Строгиот судија на America’s Got Talent, Сајмон Кауел, успеа да ги оствари соништата на уште една млада натпреварувачка.

Овојпат станува збор за Путри Ариани, слепа индонезиска пејачка која успеа да заработи златен тастер од судијата со камено срце.

„Мојот најголем предизвик е тоа што луѓето ме гледаат како слепо лице, а не како музичар. Но, кога пејам се чувствувам како супер ѕвезда“ – рече таа пред настапот.

Сепак, хендикепот не ја спречува да има големи соништа, па таа вели дека сака да биде позната пејачка како Витни Хјустон, да добие Греми награда и да студира на Џулијард во Њујорк.

Путри се надева дека победата на познатото шоу за таленти ќе ѝ помогне да ги оствари сопствените соништа.

Во продолжение неколку интересни факти за младата Индонезијка:

Путри како бебе имала ретинопатија, предизвикана од тоа што била родена предвреме, а на возраст од 3 месеци целосно го загубила видот.

Кога имала 2 години, нејзините родители забележале дека малата Путри може да го имитира секој звук што ќе го слушне, па оттогаш почнале да ја поддржуваат за да го развие и подобри својот талент.

Освен што пее прекрасно, Путри свири на пијано и флејта, а била многу мала кога почнала да учи да свири на инструментите.

На возраст од само 8 години таа успеала да победи на шоуто за таленти Indonesia’s Got Talent во 2014-та година, а потоа на уште две локални талент шоуа.

Во родната Индонезија, Путри веќе има успешна музичка кариера, но се надева дека учеството во познатото талент шоу ќе ѝ биде отскочна штица за да ги оствари соништата.

Погледнете го настапот на Путри во продолжение:

Б. С. Б. | Црнобело