Првиот човек во светот кому му се пресадени лице и раце конечно пронајде љубов

Џесика работела како медицинска сестра во Калифорнија, но по долгото допишување на социјалните мрежи, таа одлучила да се пресели поблиску до него во Њу Џерси и да ѝ дадат шанса на љубовта.

„Прво нашата врска беше на оддалеченост, а потоа се преселив од Калифорнија за да бидам поблиску до него и пресреќна сум. Тој е мошне тивок на почетокот и не зборува премногу додека не ве запознае и внимателно гледа што се случува околу него.

Има многу знаење и може да разговара со секој човек. Многу ми се допаѓа тоа кај него, затоа што ме привлекуваат луѓе што се едуцирани и знаат добро да се изразуваат.

Ми се допаѓа тоа што е нежен, љубезен и храбар. И покрај тоа што поминал многу во животот, тој сепак е позитивен и опуштен“ – вели таа.

Џо открива дека, сега, речиси 5 години по несреќата и 2 години по трансплантацијата на рацете и лицето се чувствува самоуверено и повторно почнал да вози автомобил, а не му пречи тоа што луѓето гледаат во него кога е излезен.

„Луѓето ме гледаат и тоа не ми пречи. Јас сум висок 185cm и често носам маици со кратки ракави, па луѓето ми ги гледаат изгорените раце.

Не ми пречи што луѓето зјапаат затоа што и јас би зјапал. Можам да се самосожалувам, но не сум таква личност“ – вели тој.

Инаку, по операцијата на Џо му требало долго време да научи да ги користи новите прсти на рацете, а денес веќе може сам да готви, да исчисти, сам да си ја испере облеката, но и да ракува со мобилен телефон.

Што се однесува до љубовните врски, тој вели дека никогаш не се посомневал дека ќе ја најде вистинската љубов затоа што иако се здобил со тешки телесни повреди, тој сѐ уште е истата личност.

Б. С. Б. | Црнобело