12-годишно момче убиено во Газа сакало да стане познат јутјубер – Луѓе од целиот свет почнаа да го следат неговиот канал и му ја исполнија желбата

Детали

понеделник, 30 октомври 2023

12-годишниот Авни Алдус од Газа сонувал да стане познат јутјубер, но бил убиен на почетокот од октомври за време на нападите во градот. Откако јавноста дозна за него, јутјубери и луѓе од целиот свет почнаа да го следат неговиот канал за да му ја исполнат желбата. Сега, каналот на момчето има речиси 800.000 следбеници, а имаше само 1.000. Авни е само едно од бројните дечиња кои настрадале во конфликти и неговата приказна многу добро покажува дека во војните најмногу страдаат невините.

Во војната помеѓу Израел и Палестина загинаа илјадници луѓе, од кои огромен број се и мали деца.

Помеѓу многуте непотребни жртви е и Авни Алдус – 12-годишно момче од Газа кое сонувало да стане познат јутјубер.

Приказната на Авни е само една од илјадници, но многу добро покажува дека во целото крвопролевање, најмногу страдаат невините.

Авни бил убиен на 8-ми октомври, а светот дозна за него преку неколку објави на Твитер и ТикТок.

На повеќето објави има фотка и видео на кое Авни се заблагодарува за неговите 1.000 следбеници на Јутјуб.

https://www.youtube.com/watch?v=XboD9Eg1z1o

Тој направил канал за видеоигри и сонувал да стане познат јутјубер, но неговите соништа биле згаснати прерано.

Според објавите што се споделуваат на социјалните мрежи, Авни сакал да стигне до 100.000 следбеници на Јутјуб.

https://www.tiktok.com/@mirna.aabed/video/7293911696870067502

Неговата приказна почна масовно да се споделува, па јутјуберите од целиот свет решија да му ја исполнат желбата.

Во период од недела-две, каналот на Авни собра речиси 800.000 следбеници.

Последното, но и останати видеа на неговиот канал веќе се преплавени со коментари за младото момче:

„Се надевам дека ќе ни простиш за нашата слабост и неможноста да те заштитиме тебе и целото твое семејство“.

„Почивај во мир Авни, овде се собраа многу луѓе кои ти одаваат почит. Секогаш ќе те помниме. Жал ми е што не можеш да види колку луѓе собра на твојот канал, но се надевам и верувам дека можеш да го видиш сето ова од рајот“.

„Успеа. Сега имаш над 800.000 следбеници. Сите сме горди на тебе“.

„Честитки што стана познат Авни. Ти си одличен гејмер“.

„Почивај во мир мало момче. Заслужуваш многу повеќе од она што ти го понуди светот. Се надевам дека сега си на добро место“.

Спирова С. | Црнобело