Ријалити ѕвезда со исповед: „Сакав задник како Ким Кардашијан, ќе умрев по операцијата за лифтинг“

Детали

вторник, 27 февруари 2024

„Ми извадија еден литар гној. Тоа беше толку страшно и болно. Низ цела болница ме слушаа како врескам“ – британска ријалити ѕвезда раскажува како за малку ќе го загубела животот по операција за бразилски лифтинг на задникот. Вели дека воопшто не била свесна колку се опасни последиците.

Општо познато е дека операцијата за бразилски лифтинг на задник е една од најопасните пластични операции, а британската ријалити ѕвезда и инфлуенсерка Софи Касеи го раскажа своето хорор искуство.

Таа вели дека почнала да добива понуди за бесплатна операција на задникот во Турција.

„Со оглед на тоа што немав премногу облини претходно, мислев дека ова е одлична можност и дека би можела да изгледам како Ким Кардашијан.

Мојот задник не беше најдобар, но сега кога се навраќам, посакувам само да ставев импланти, или да одев во теретаната“ – раскажува Софи.

Таа на само 24 години одлучила да отпатува во Турција и да ја направи операцијата за бразилски лифтинг на задникот - процедура во која масното ткиво од стомакот, колковите или бедрата се префрла во задникот.

Оваа операција се состои од два дела. Во првиот дел лекарите го вшмукуваат масното ткиво од останатите делови на телото, а потоа се пренесуваат во задникот.

Ријалити ѕвездата вели дека набрзо по операцијата знаела дека нешто не е во ред.

„Неколку дена подоцна се погледнав во огледало и си реков: ‘Чекај, нормално ли е да имам вакви видливи повреди? Дали треба вака да изгледам?’“ – раскажува таа и додава дека во задниот дел на телото имала изгореници, но не реагирала затоа што сметала дека треба време за телото да ѝ заздрави.

Но, по 8 недели, ситуацијата се влошила. Прво почнала да чувствува болка во левиот дел од задникот.

Во тој период таа била во Мексико и веднаш отишла во болница, а како што вели, била изненадена од тоа колку лекарите биле испаничени.

Кога ги прашала што се случува, лекарите ѝ рекле дека имала гнојна циста во задникот и дека може да умре ако цистата пукне.

„Им реков веднаш да ми резервираат лет за дома и дека ако умирам, сакам моето семејство да биде околу мене. Така се вратив во Њукасл и веднаш отидов во болница.

Таму ме задржаа преку ноќ, а утрото бев на операција за да го извадат гнојот од моето тело.

Ми извадија еден литар гној. Тоа беше толку страшно и болно. Низ цела болница ме слушаа како врескам. Како да бев во пекол, не можев да одам, не ја чувствував ногата“ – раскажува Софи.

Таа покажа фотографија од блиску како изгледала лузната од каде што ѝ бил отстранет гнојот и вели дека се чувствува несигурно заради тоа.

Софи денес ја споделува својата хорор приказна за да ги предупреди жените да знаат кои се опасностите од оваа процедура.

Б. С. Б. | Црнобело