„Пробувам да забременам, но се плашам дека ќе бидам ужасна мајка - Што да правам?“

Детали

четврток, 29 февруари 2024

„Мојот сопруг и јас веќе подолго време пробуваме да добиеме дете. Но, јас сум уште сега преплашена дека ќе бидам ужасна мајка на детето. Навистина не знам што да правам“, пишува во анонимното прашање на Британка.

Многу Британци кои имаат мали и поголеми лични проблеми и дилеми, анонимно бараат одговори на своите прашања преку Metro.co.uk. 

Овој пат, Ем Кларксон, познат авторка и новинарка во Британија, одговара на прашањето на жена која сака да се откаже од идејата да роди дете, бидејќи смета дека нема да биде добра мајка.

„Драга Ем, мојот сопруг и јас веќе подолго време пробуваме да добиеме дете. Но, јас сум уште сега преплашена дека ќе бидам ужасна мајка. Што да правам?“, стои во прашањето на жената.

Одговорот кој ѝ го дава Ем на жената е од лично искуство, а е поврзан со нејзината бременост и ќерката што ја родила пред една година:

„Не знам многу работи, но непишано правило е дека ако си лош човек, не знаеш дека си лош, но и дека ужасните мајки најверојатно не се грижат многу за тоа дали ќе бидат добри или лоши мајки.

Стравот што го искусуваш е најверојатно поради дилемата што ја имаш дали сакаш или сепак не сакаш да имаш дете. Ова е нешто што мора да го решиш сама или со партнерот, без притисок.

Разговарај со него навреме, кажи му како се чувствуваш, можеби во моментов не си подготвена да бидеш мајка, но тоа не значи дека чувствата нема да ти се сменат во иднина.

Во секој случај, мора да бидеш отворена веднаш, пред да биде предоцна.

Но, ако длабоко во себе знаеш дека сакаш да станеш мајка, верувај дека сите стравови ќе исчезнат штом ќе се роди бебето. Ќе го сакаш, ќе го чуваш, неговите потреби ќе ги ставиш пред своите и ќе сфатиш дека сите стравови биле непотребни.

Јас и денес не можам да поверувам колку се трансформирав во последнава година, откога се роди ќерка ми. Од моментот кога ја видов и ја зедов во рацете, знаев дека веќе ништо нема да биде исто, а дека јас ќе направам буквално сè за неа, без да ми трепне око.

Ако сум искрена, и јас најверојатно мислев дека ќе бидам лоша мајка и понекогаш чувствувам вина дека не правам доволно, но потоа сфаќам дека давам сè од себе и дека тоа е океј.

Па, ако ти значи нешто, верувај, сите сме загрижени на почетокот, а потоа се изненадуваме самите себеси што сè можеме“.

А. Ј. | Црнобело