Деца во градинка претепуваат другарче: Застрашувачко вирално видео

Детали

петок, 01 март 2024

„Негувателката излегла затоа што имала други обврски. Згрозени сме од тоа колку сурови можат да бидат овие деца, зарем така се воспитани?“ – велат родителите на момчето кое е брутално претепано од другарчињата во градинка во видеото што вирално се шири на социјалните мрежи.

На социјалните мрежи вирално се шири видео од градинка во Казахстан, во кое се гледа како мали момчиња претепуваат нивно другарче во групата, а родителите од Балканот го споделуваат масовно и се згрозени од она што го гледаат.

Што всушност се случило?

Иако во објавите од Србија не се споменува каде и кога се случил настанот, по кратко истражување утврдивме дека овој инцидент се случил на 21-ви февруари годинава во Алмати, Казахстан.

Видео снимката е од надзорните камери во градинката, а била објавена на социјалната мрежа „Телеграм“ откако родителите на 3-годишното момче што било претепано ја контактирале редакцијата на ZTB.KZ.

„Нашето дете беше брутално претепано од другите деца. Нападот траел околу 5 минути. Нашиот син бил мирен кога децата го турнале на земја и почнале да го тепаат.

Потоа дознавме дека децата во моментот биле оставени без надзор. Негувателката излегла затоа што имала други обврски.

Згрозени сме од тоа колку сурови можат да бидат овие деца! Дали вака ги воспитуваат родителите? Што е ова?“ – прашуваат родителите на момчето.

Инаку, детето по инцидентот било примено во болница со потрес на мозокот, а родителите раскажуваат како учителката кога се вратила воопшто не му обрнала внимание на детето кое плаче и, на крај, кога им го предавала на родителите им рекла дека само се удрило.

Според информациите објавени во казахстанските медиуми, учителката во тој миг била до мензата за да земе ручек за децата, а против неа е поднесена соодветна дисциплинска постапка.

Исто така, покрената е и кривична постапка против неа и се товари дека не ја извршувала должноста правилно, со што ги загрозила животите и здравјето на децата.

Б. С. Б. | Црнобело