Родила 51 дете, па направила операција за да не забременува - Која е „најплодната жена во светот“?

Детали

сабота, 23 март 2024

По присилниот брак со многу постар маж, Маријам од Уганда првпат родила кога била тинејџерка. Тогаш добила близнаци, во втората бременост добила тројка, а во третата – четворка.

Маријам Набатанзи Бабирје од Уганда има родено 51 дете, од кои 44 се живи.

Таа се смета за жената која родила најмногу деца во помодерно време.

Според Википедија, има само три жени кои се верува дека родиле повеќе деца од неа. Но, тие живееле пред 1700-тите и податоците за нив може и да не се потполно точни.

Истовремено, Маријам важи за „најплодната жена во светот“ и има ретко генетско нарушување познато како хиперовулација.

Кај лицата со реткото нарушување, јајникот ослободува повеќе од една јајцеклетка во еден менструален циклус.

Што значи, овие жени имаат многу поголеми шанси за бременост.

Маријам е родена во 1980-та, а кога имала само 12 години, била присилно омажена за 45-годишен маж кој бил и насилен.

Таа останала бремена веќе следната година, кога родила близнаци. Вo 1996-та родила тројка, а околу 19 месеци подоцна, родила и четворка.

Додека да наполни 23 години, Маријам веќе имала роденo 25 деца.

Според некои извори, таа продолжила да раѓа бидејќи добивала совет од другите луѓе дека со тоа ќе го намали бројот на бремености во иднина. Истовремено, ѝ кажувале дека ако не е бремена, ќе има сериозни проблеми со здравјето.

Ова, секако, не е точно, но кога ќе се земе предвид дека Маријам потекнува од многу сиромашна област во Уганда, јасно е дека немала со кого да се консултира.

Откако го родила 42-то дете, сопругот на Маријам го напуштил семејството бидејќи повеќе не можел да ги издржува ситe деца.

Уште полошо – го продал и имотот на којшто живееле Маријам и децата.

Нејзината баба ја примила со децата кај себе, но помошта не траела долго.

Маријам сфатила дека останала бремена со близнаци пред сопругот да си замине, а набрзо потоа починала и баба ѝ.

По ова, други роднини почнале да пробуваат да го земат имотот на баба ѝ, но Маријам успеала да се избори и да го откупи.

Иако уште не бил целосно исплатен, барем со децата не биле на улица. Но сепак, Маријам мора сама да се грижи за сите.

Семејството на Маријам моментално има 66 члена, вклучувајќи ги нејзините деца, неколку снаи и неколку внуци.

Маријам работи како шивачка и фризерка, а добива помош и од донации.

А, откако ги родила последните близнаци со кои останала бремена пред сопругот да ја напушти, на Маријам ѝ била направена операција со која се спречуваат бремености во иднина.

Спирова С. | Црнобело