Млада мајка мета на критики: „Ќерка ми има 8 месеци и е модел – веќе заработи 4.000 долари“

Детали

недела, 24 март 2024

Мајка од САД вели дека ќерка ѝ го добила првиот ангажман на само пет месеци и дека веќе има многу понуди за работа. Но, истакнува дека не планира да „ѝ го украде детството“ и да ја тера да стане модел, иако веќе добива критики.

Јавноста има поделено мислење кога станува збор за децата кои „работат“ како модели уште пред да наполнат една година.

Од една страна, некои мислат дека родителите ги искористуваат нивните деца за слава и пари, но од друга, постојат и оние кои мислат дека на овој начин родителите (барем донекаде) им обезбедуваат сигурна иднина.

Сара Луцкер од САД е мајка на 8-месечно девојче и вели дека ќерка ѝ е модел и веќе има заработено над 4.000 долари.

Сара не е инфлуенсерка и нејзините профили на ТикТок и Инстаграм се приватни, а вели дека ќерка ѝ снима кампањи само за американски брендови.

Ќерка ѝ Моли Џил го добила првиот ангажман на 5-месечна возраст и досега била дел од кампањи за Walmart и Costco – најпопуларните ланци супермаркети во САД.

Моли била родена во јули 2023-та, а нејзината 27-годишна мајка најпрво испратила нејзини фотки на агенција за деца модели.

На 5-месечна возраст ѝ направила фотосесија за апликацијата Babylist каде што родителите кои објавуваат фотки од нивните деца можат да добијат подароци за бебиња.

Освен кампањите за супермаркетите, Моли позирала за уште неколку познати американски брендови.

„Многу бев исплашена за нејзината прва фотосесија. Не знаев што се случува бидејќи никогаш не сум направила нешто слично“, вели мајка ѝ.

„Уште откако се роди, велев дека ова е свет на Моли, а ние само живееме во него. Таа е најдобра“.

Сара вели дека ја добила идејата за „професијата“ на Моли од нејзина пријателка.

„Имам пријателка и двете нејзини ќерки се модели. Па, ја прашав дали агенциите за модели се заинтересирани за бебиња.

А, на сетот, сите беа многу добри. Имаа и личност која беше задолжена да ги забавува бебињата“.

Иако Моли почнала да добива многу понуди за работа, мајка ѝ вели дека не планира „да ѝ го украде детството и да ја тера да стане модел“.

Имено, ќе ѝ дозволи на ќерка ѝ таа да одлучи што да прави, а парите што ги заработува сега ги ставала на посебна сметка за неа.

„Агенцијата зема 20% од заработката, а останатите пари се за Моли. Јас и сопругот ги немаме допрено“.

Сепак, иако можеби Сара има најдобри намери за ќерка ѝ, на медиумите каде што се споделува нејзината приказна има бројни критики:

„Велиш ’Ќерка ми заработи 4.000 долари‘. Мислам дека треба да кажеш ’Ќерка ми заработи за мене‘“.

„Не треба да заработуваме на грбот на нашите деца“.

„Можеби треба да прочиташ нешто за родителите на Брук Шилдс или Бритни Спирс“.

„Изгледа како да си ја продаваш ќерката“.

„Зарем не е ова нелегално, да го тераш детето да заработува за тебе?“

Што мислите вие – дали е во ред децата уште од најрана возраст да работат како модели?

Спирова С. | Црнобело