„Ќе биде храбра како мене“: Девојче (7) кое го победило ракот со емотивна порака до Кејт Мидлтон

Детали

вторник, 26 март 2024

„Ќе се избори со болеста исто како и јас“, вели 7-годишно девојче од Англија кое имало леукемија и додека примало терапија, ја запознало Кејт Мидлтон, а потоа се слушале и по телефон.

Мила Снедон е 7-годишно девојче кое се изборило со ракот, а во периодот додека траела нејзината терапија, таа имала можност да се сретне со Кејт Мидлтон.

Сега, откако принцезата соопшти дека и таа има рак, храброто двојче ѝ упати емотивна порака за поддршка.

Мила и принцезата се сретнале во 2021-ва, додека девојчето водело битка со леукемија.

„Таа ќе биде храбра бидејќи и јас бев и ќе се избори со болеста исто како и јас“, вели Мила за британскиот The Mirror.

За медиумот се огласи и мајката на девојчето – Линда.

„Кејт е мајка, сопруга, млада е, убава, во добра форма и ќе се справи со болеста.

Ова покажува дека ракот не избира, може да се јави кај секого, во кое било време. Ѝ посакуваме мирно и брзо оздравување“.

Линда додава и дека Кејт ја сподели веста за нејзината болест на втората годишнина од ремисијата на малата Мила.

„Во тој миг, Мила се сврте кон мене и ми рече дека сака да ѝ испрати картичка со порака на Кејт приватно. Па, Мила ќе стапи во контакт и со неа на нејзин, приватен начин.

Кејт ѝ покажа на Мила огромно сочувство, грижа и поддршка и за време на терапијата, и потоа. Па, емотивни сме кога гледаме како самата се соочува со здравствени проблеми“.

Наводно, официјалната средба меѓу девојчето и Кејт не била единствената и принцезата редовно ја следела состојбата на малата Мила и неколкупати се слушнале по телефон.

Во декември 2021-ва, Мила дури била поканета и на божиќниот концерт што го организира Кејт.

Спирова С. | Црнобело