„Го лекував ракот со сок од моркови и диета што ја најдов на интернет – за малку ќе умрев“

Детали

среда, 22 мај 2024

„Најдов еден Американец кој го промовираше природниот третман. Имаше подкаст и имаше интервјуа со лекари и професори, кои го промовираа овој третман“ – раскажува моделот Ирена Стојнова која 2 и пол години се обидувала да го излекува ракот по природен пат и за малку ќе платела со животот.

Ирена Стојнова (39) е поранешен модел кој живее во Англија, а во 2021-ва година ѝ бил дијагностициран Не-Хочкинов лимфом - облик на рак кој започнува од белите крвни клетки, односно лимфоцити.

Наместо да ги прифати советите на лекарите и под итно да започне со хемотерапија, таа одлучила да се лекува сама со помош на советите и планот за исхрана што го нашла на интернет.

Таа била уверена во успехот на овие третмани, благодарение на луѓето што зборувале за нивната ефикасност.

Потрошила околу 2.500 евра за соковници, а секој ден по 3 часа ги подготвувала соковите за следниот ден, во надеж дека по природен пат ќе успее да ја победи болеста.

Така, две и пол години Ирена била на диета само со сокови, па потоа почнала да се храни само со свежа храна, пробала и Intermittent Fasting, посебни чаеви и билки.

Во изјава за британските медиуми, таа вели дека посебно ги слушала советите на еден човек со илјадници следбеници на социјалните мрежи кој тврдел дека телото може да се излекува само, а дека е неопходна само радикална промена на начинот на живот и на исхраната.

„Најдов еден Американец кој го промовираше природниот третман. Имаше подкаст и имаше интервјуа со лекари и професори, кои го промовираа овој третман и велеа дека стандардниот третман е многу суров.

Велеа дека луѓето кои одат на хемотерапија се мрзеливи и не сакаат да вложат труд“ – вели таа и дополнува дека ги купила неговите 3 книги со рецепти, диети и слично.

Иако не чувствувала промени и гледала дека нејзиниот организам сè повеќе слабее, таа не се откажувала од обидите да се излекува сама.

„Не престанував, бев многу изнемоштена, не можев да спијам и имав халуцинации. Не можев да соберам сила ниту да му отворам врата на доставувачот.

Не можев да дишам затоа што белите дробови ми беа полни со течност, а ослабев речиси 20 килограми заради сите диети“ – раскажува таа.

Минатата година, во 2023-та, таа била пренесена во болница во очајна состојба и било утврдено дека болеста напреднала до третиот стадиум.

Во првите 24 часа ниту лекарите не можеле да потврдат дека таа ќе преживее, а морала да помине речиси 3 месеци на одделение за интензивна нега.

Лекарите морале да ја убедуваат неколку дена пред да одлучи дека треба да почне со хемотерапија.

По традиционалната терапија, ракот бил ставен во мирување, а таа има важна порака до сите:

„Сега можам да ви кажам дека несаканите ефекти од хемотерапијата се смешни во споредба со несаканите ефекти што ги претрпев од природната терапија.

Би рекла дека е супер да верувате во некои работи, но само ако се научно докажани и не е во ред да ги игнорирате лекарите.

Јас го направив тоа и за малку ќе платев со животот“.

Б. С. Б. | Црнобело