19-годишна девојка за нападот од ајкула: „Ме зграпчи во плиткото, ја претепав со слободната рака“

Детали

вторник, 11 јуни 2024

„Еден голем дел од мојата рака го немаше. Мислев дека ќе ги загубам прстите и раката ми изгледаше ужасно“ – храбра Американка раскажува како успеала да преживее напад од ајкула и како се одбранила со двете раце.

Во минатото се веруваше дека ако ве нападне ајкула треба со раката да ја удрите по носот, затоа што тоа ѝ е најчувствителниот дел од телото, но одамна веќе е докажано дека тоа е мит во кој не треба да се верува.

Приказната на 19-годишната Дамијана Хемфри е топ тема во сите светски медиуми, откако таа тврдеше дека со раката ја претепала ајкулата која ја зграпчила на брегот на Галвестоун во Тексас.

Дамијана денес раскажува како со нејзините двајца браќа, сестра ѝ и снаа ѝ заминала на одмор и била со нив во водата до половина.

Во моментот штом нејзината снаа рекла дека забележала нешто како се движи во водата, другите почнале да излегуваат, но Дамијана доживеала непријатно изненадување кога ајкула со големина од 1-1,5 метри ја зграпчила за раката.

Во момент на паника, Дамијана почнала да ја удира со слободната рака ајкулата, сè додека не успеала да се ослободи.

„Во тој миг, не сфатив што се случува. Ми наликуваше на сон. Најверојатно брзата реакција на моето тело ме спаси. Во моментот не чувствував ништо, не размислував за ништо“ – раскажува таа.

Но, дури откако излегла од водата на безбедно и кога видела во каква состојба ѝ е раката, тогаш почнала да паничи.

„Во моментот кога стигнав до татко ми, почнав да паничам, затоа што за првпат си ја видов раката. Еден голем дел од мојата рака го немаше. Мислев дека ќе ги загубам прстите и раката ми изгледаше ужасно“ – се потсетува.

По ова девојката итно била пренесена во болница, а лекарите успеале да зашијат 4 од нејзините прсти кои биле повредени во нападот.

Раката ѝ била ставена во гипс, а потоа се очекува да оди на физикална терапија со цел да си ја врати мобилноста и силата.

Таа даде препораки до сите оние што сакаат да уживаат на плажа и смета дека најголемата грешка што таа и нејзиното семејство ја направиле е тоа што биле на плажа за време на залезот на сонцето.

„Ајкулите најчесто се приближуваат до брегот во периодот кога заоѓа и кога изгрева сонцето и тоа е најлош период за да се оди на плажа. Исто така, неопходно е да бидете внимателни и да не влегувате во водите ноќе“ – вели таа.

Б. С. Б. | Црнобело